– Eg er framleis sint, og godtek ikkje kva som helst

Allereie første dagen som pensjonist hadde han lesarinnlegg på trykk i avisa han har styrt i 20 år.

– Det kan hende det kjem meir også. Eg får sjå kva som irriterer meg utover i veka, ler han.

Nok var nok

For i haust bestemte den profilerte redaktøren seg for at nok var nok. Og det i jubileumsåret for Ytre Sogn.

– Då var det like greitt å gi seg 100 prosent. Eg var også 20 år i Sogn Dagblad. Over 40 år får vere bra det, seier han og kjenner seg trygg på at han overlèt ei ultralokal skute som skal segle godt inn i framtida.

– Her er det barnehageungar som får besøk av brannbilen, det er jenter som reiser i Garden, skuleklassar som lagar dekorasjonar til jul og så vidare. Om du klarer å bli så lokal, så vil slike ting i lang tid halde liv i avisene, seier han.

– Skriv rett frå levra

Høyang idrettslag er mellom dei som har vore mykje omtala i avisa. Sjølv om omtalen ikkje alltid har vore like positiv, har også dei sett stor pris på redaktøren sitt arbeid.

– Han har gjort mykje bra. Skrive mykje rett frå levra, men slik må det vere. Vi toler det, smiler styremedlem i idrettslaget, Idar Henning Måren.

Sveinar Høyheim, leiar i idrettslaget, skildrar «Suen» som ein fargeklatt i lokalsamfunnet.

– Han er jo fritalande og du veit aldri kvar du har han, ler han.

Ekkel oppleving

Og det har industrisamfunnet gjort til gangs. Spesielt med tanke på Fundo-konkursen tilbake i 2009. Det er den mest spesielle hendinga «Suen» trekkjer fram gjennom sine 20 år som redaktør i lokalavisa.

Nyhenda fekk han tidleg for å få den med i avisa. Så konkursen visste han om før tilsette ved felgfabrikken visste det sjølve.

– Eg fekk spørsmål frå to mødrer som jobba ved Fundo, og sa eg ikkje visste noko. Det følte eg var litt ekkelt. Eg visste at folk hadde mista jobben, før dei, seier han.

Skal vidareføre

May-Britt Eide er kvinna som no tek over redaktøransvaret i avisa. Eide vedgår at ho kjenner ansvaret tynge, men lovar å vidareføre den ultralokale avisa som er nært på folk – der folk er.

Avisa har sidan 2012 hatt ein jamn auke i abonnentar. I 2016 var talet oppe i 1.400. Avisa gjekk også med 600.000 i overskot.

• Les også: Nesten alle går tilbake, men ein miniputt aukar!
• Les også: Denne avisa aukar opplaget sjølv om lesarane flyttar bort

– Vi skal ikkje kvile på lauvbæra. Vi skal stå på vidare for å få fleire lesarar både av nett- og papiravisa, forsikrar ho.