– Dette er eit farvatn vil aldri har vore i før. 110 kroner kiloen er historisk høge prisar, og fantastisk for dei som får ta del i det, seier Tor Hjalte som er driftsdirektør for lakseeksportøren Norwell i Florø.
I september fjor var prisen til samanlikning litt over 50 kroner per kilo.
Allereie før påske meldte nettstaden iLaks at lakseprisane måtte skrivast med tre siffer.
Sidan har prisane heldt fram med å stige. Men utan at kundane kjenner det. Framleis er det meste av fisken du finn i butikken innkjøpt til lågare prisar på kontrakt.
IntraFish melder at det er seld laks til Asia for opptil 140 kroner per kilo.
I veke 14 var snittprisen for fersk laks 93,21 kroner pr. kilo. Det viser tal frå Statistisk sentralbyrå (sjå graf).
– I påskeveka har vi ekstra høg etterspurnad. Samstundes er det lite slakting rundt påske. Dette driv opp prisen, seier sjømatanalytikar Paul T. Aandahl i Sjømatrådet til NTB.
Trur på høgre prisar til over sommaren
Lakseeksportør Tor Hjalte ser ingen teikn til at prisane kjem til å gå ned med det aller første.
– Prisbiletet vil nok vere høgt. Om ikkje så høgt som i dag, så vil prisen halde seg høg til over sommaren, seier Hjalte.
Forklaringa på lakseprisane er stor etterspurnad kombinert med lite fisk i marknaden. Låg produksjon har også vore regelen hos dei andre store lakseoppdrettarane: Chile, Skotland og Færøyane.
I tillegg har kaldt vêr gjort at det tek lengre tid før laksen er oppe i slakteklar vekt på 4–5 kilo.
Først i august eller september reknar lakseeksportøren i Florø med at det kjem meir fisk i marknaden.
– Då vil vi få ei justering av prisane, seier Hjalte.
Utfordrande kredittgrenser
På sikt kan dei høge prisane skape nye utfordringar for eksportørane, seier Hjalte.
– Kredittgrensene ligg der dei ligg. Har du ei grense på 10 millionar for ein kunde og den er brukt opp, så må du få inn meir pengar før du kan selje meir fisk. Så akkurat den biten er ei utfordring.
Han legg til:
– Vi må berre håpe at kundane i andre enden er flinke til å få inn pengar, slik at vi klarar å halde hjula i gang.