– Det var vatn i inngangspartiet, i kyrkjerommet, i sidesalen, i kjellaren og på kjøkkenet.
Jorunn Beinnes Roset er soknerådsleiar i Nordsida kyrkje i Stryn. Påskeaftan skulle ho berre ein liten tur innom kyrkja.
Då ho låste seg inn, blei ho møtt av ei kyrkje full av vatn.
– Vasspruten stod ut frå kjøkkenet og lak vidare inn i kyrkjerommet. Det var vatn i absolutt alle rom, seier ho.
Det var avisa Fjordingen som først omtalte saka.
Lekkasjen starta i ein slange i ein kjøkkenbenk.
Kyrkjeverje i Stryn, Kari Synnøve Muri, veit ikkje kor lenge det har stått slik, men trur det er snakk om fleire timar.
– No ventar vi på ein rapport frå for å få kartlagd omfanget av skadane, seier ho.
Må kanskje flytte konfirmantane
Lekkasjen gjer at det spøkjer for den planlagde konfirmasjonsgudstenesta i mai.
Etter to år med pandemi hadde soknerådsleiar Roset og resten av soknerådet gleda seg til å halde kyrkja open igjen.
– Det er synd at vi kanskje må flytte konfirmantane til andre kyrkjer, seier Roset.
Ein av dei som skulle ha konfirmert seg i Nordsida er Madeleine Steinsåker Veddegjerde.
– Det vil sjølvsagt vere litt dumt viss eg ikkje kan konfirmere meg i kyrkja vår, seier ho.
Alternativet er Randabygda kyrkje i Stryn, noko konfirmanten tykkjer er ok.
– Men vi veit ikkje noko enno, så det får skje det som skjer.
Mari Salkjel er prost i Nordfjord prosti. Ho seier til NRK at «det er omfattande skader, og det er blitt gjort viktig arbeid for å avgrense skadane så mykje som råd.»
– Vi veit enno ikkje om det er realistisk å gjennomføre konfirmasjonsgudstenesta, då det framleis er behov for å tørke bygget, legg ho til.
Verdifullt inventar klarte seg
Muri har jobba som kyrkjeverje i Stryn kommune i snart fire år, og har aldri opplevd liknande før.
– Det kom heldigvis raskt folk til for å hjelpe, og det gjorde at vi klarte å berge verdifullt inventar som alterparti, preikestol, orgel og piano.