Ønskjer fleire med fotlenke

– Vi ser at det fungerer som eit slags førebyggande arbeid. Tilbakefallsprosenten er låg, seier leiar for friomsorga i Sogn og Fjordane, Erik Onstad.

• Les også: Vil ha fotlenke på voldelige menn

Samarbeider med nabofylket

I fjor var det 210 i soningskø i Kriminalomsorgen region vest, og stadig fleire ønskjer denne type soning. På landsplan er det over 342 lenker, og ønsket er å utvide tilbodet.

– Dette er eit ønskje frå fleire hald. Det er nokre gonger over 300 som sonar med lenke i heile landet, og vi trur at det vil kome fleire som ønskjer denne ordninga, fortel leiaren for friomsorga.

• Les også: For få ansatte til å ta seg av domfelte med fotlenke

Friomsorgskontoret samarbeider med Møre og Romsdal om jobben. Det er til saman 27 lenker i begge fylka, og det er mellom 25 og 26 lenker i bruk til ei kvar tid.

Møter domfelte heime

I Møre og Romsdal er det fleire som søkjer om slike soningstilhøve. 18 personar sonar med lenke i nabofylket, og sidan tilbodet kom har til saman 130 sona slik der.

Allereie i 2008 blei Sogn og Fjordane valt ut som eitt av seks prøvefylke for å teste fotlenkesoning. Sidan den gong har det blitt meir populært.

– Det fungerer godt. Vi reiser på umelde besøk for å undersøkje om den som sonar held seg til reglane for slik soning. I tillegg har vi møter fleire gonger i veka med den som sonar for å snakke om brotsverket den har gjort og korleis det går, fortel Onstad.

• Les også: For få ansatte til å ta seg av domfelte med fotlenke

Åtte med lenke heile tida

Det er i snitt åtte personar som sonar med lenke i Sogn og Fjordane til ei kvar tid. Soningstida er på fire månader. Nokre kjem frå fengsel og får sone dei fire siste månadane med lenke i heimen.

– Det vert ein mjukare overgang frå fengselet til samfunnslivet. Og det ser vi fungerer, sier Onstad.

Dei som soner heime får vere i arbeid og ha kontakt med familien sin. Men kan ikkje ruse seg eller drikke alkohol.

– Det er ikkje alle som får sone med lenke. Dei som ønskjer det må søkje, og dei kan ikkje vere dømde for vald i heimen, i saker som går på moral eller liknande.

Det er heller ikkje eigna for dei med store rusproblem og som ikkje har arbeid.

– Eit av goda er at den domfelte ikkje har kontakt med det kriminelle miljøet i eit fengsel. Og dermed unngår ein at den domfelte til dømes får eit kriminelt nettverk.