Ny sjef på DNS: – Eit godt arbeidsmiljø må ligge i botn av eit teater

Solrun Toft Iversen kjem frå stillinga som teatersjef ved Det Vestnorske Teateret i Bergen, og er tilsett der fram til sommaren 2023.

– Det Vestnorske Teateret har vist at det går fint å ha eigne nisjeteater i ein by på Bergen sin storleik. Men DNS er ein annan institusjon med ein litt annan samfunnsoppgåve, difor blir repertoaret annleis. Mitt teatersyn, mi oppfatning av kvalitet, og ikkje minst mitt store ønske om å stå i ein levande dialog med publikum, det vil eg ta med meg vidare.

DNS er den viktigaste institusjonen for scenekunst på Vestlandet. Teateret har status som nasjonal kulturinstitusjon og vert finansiert over statsbudsjettet.

Turbulens

Når Stefan Larsson går ut av stillinga har han leia DNS sidan januar 2020. Larsson har fått kritikk for å vere lite til stades på teateret, ta for mange oppdrag i Stockholm, og å overlate mykje av dagleg drift til HR-sjef Hanne Jacobsen.

Både Bergensavisen og Bergens Tidende har skrive om konflikten rundt arbeidsmiljøet på huset. Tidlegare medieansvarleg Ole Friele brukte ord som fryktkultur og trakassering i et avskilsbrev til teatersjefen.

– Det har vore mykje turbulens ved DNS. Korleis vil du skildre situasjonen teateret er i no?

– Eg kjenner til turbulensen og er trist for det, men eg er ikkje den rette til å seie noko om status i dette no. Etter det eg forstår, så går føre seg det gode prosessar, og fram til juni 2023 er det Stefan Larsson som har hand om dette, og eg er sikker på at han gjer det på ein god måte.

– Eg er ikkje i tvil om at eit godt arbeidsmiljø med gjensidig anerkjenning og respekt må ligge i botnen av eit teater med gjennomslagskraft. Eg trur på å anerkjenne det som finst av utfordringar og møte dei på ein open og involverande måte.

Må bety noko

Toft Iversen meiner teateret må vere relevant for publikum.

– Relevans handlar heilt grunnleggande om at både vi og publikum må kjenne at det betyr noko. Ei av teateret sine viktigaste oppgåver er å leggje til rette for at vi som menneske forstår kvarandre litt betre. Vi skal jobbe med materiale og historier som kan tilføre noko til den tida og dei utfordringane vi står i som menneske.

Nyttig røynsle

Toft Iversen vart teatersjef ved Hordaland Teater i 2017, og var med på å flytte dette til sentrum og utvikle Det vestnorske Teateret i Bergen.

Katrine Trovik er styreleiar for DNS. Ho har leia arbeidet med å finne ny sjef ved teateret.

– Er tilsetjinga av Toft Iversen ein del av løysinga på problema ved DNS?

– Eg vil ikkje seie det på den måten, men når ein skal tilsette ein teatersjef, så spelar det inn kva behov teateret det har. Toft Iversen har unik røynsle med å leie eit teater gjennom flytting, og det vil vere spesielt nyttig når teateret skal gjennom ein stor oppussingsprosess. I tillegg har vi lagt vekt på å tilsetje ein leiar som er til stades.

Må overlevere eit fungerande teater

Arne Kambestad er tilsetterepresentant i styret. Han er hundre prosent sikker på at det Solrun Toft Iversen er det beste valet av leiar for DNS

–Toft Iversen skal ikkje få ansvaret for å løyse problema med arbeidsmiljøet ved DNS, men vi har tillit til at ho vil gjere ein god jobb i fortsetjinga av arbeidet.

– Vi har prosessar i gang på teateret no, mellom tillitsvalde og leiinga, og det vil vere Stefan Larssons oppgåve å overlate teateret i ein stand der ting fungerer i alle ledd, seier Kambestad.

Eit godt val

– Tilsettinga av Solrun Toft Iversen som ny sjef ved DNS er eit godt val, seier Hilde Sandvik, tidlegare kulturredaktør i Bergens Tidende og programleiar for Norsken, svensken og dansken på NRK.

– Toft Iversen kjenner huset, og veit kor skoen trykkjer. Dessutan bur ho i byen, og har gjort mange gode grep ved Det Vestnorske Teateret. Så eg har tru på dette, seier Sandvik.