Fredag kveld går den første av Frank Aarebrots minneforelesingar av stabelen. Denne helga er det eitt år sidan den kjende professoren og statsvitaren gjekk bort.
Få trudde det var mogleg å lage engasjerande, direktesendt fjernsyn av ein professor og ein powerpoint-presentasjon, men maratonsendingane med Frank Aarebrot vart svært populære.
Forelesingar om 200 år med norsk historie på 200 minutt, andre verdskrig på 200 minutt og 227 år med amerikansk valkamp på like mange minutt, sende Aarebrot for alvor inn i stovene til det norske folk.
Fascisme på 200 minutt
Fredagens minneforelesing er den første av det som skal bli ein årleg tradisjon for Universitetet i Bergen, der Aarebrot var tilsett.
Den er eit samarbeid mellom UiB, Aarebrot sin familie og Studentersamfunnet i Bergen. NRK sender den direkte på NRK2 frå klokka 19.55. Det er professor Bernt Hagtvet ved Universitetet i Oslo som skal halde forelesinga.
– Frank var ein folkeleg, varm og flott akademikar som eg saknar nesten kvar dag. Dette er ei stor ære, seier Hagtvet om det å vera først ut.
– Hensikta er å kunne halde ved like den munnlege forelesingsforma til Frank. Han inspirerte og førte studentane fram og tok dei med på ein erkjenningsprosess.
Du kan følgje forelesinga direkte frå klokka 19.55 i toppen av artikkelen.
BT-redaktør: – Viktig og aktuelt tema
Tittelen på kveldens direktesende forelesing er «Kommer fascismen tilbake?».
– Mange trudde fascismen var død. Men no vi ser eit slags «deja vu». Det kjem tilbake element frå europeisk fascisme. Det i seg sjølv er både moralsk og fagleg interessant, seier Hagtvet.
- Les også:
På søndag, eitt år etter Aarebrot sin død, er det val i Sverige. Både der, og elles i Europa er det vekst i fascistiske miljø
Politisk redaktør i Bergens Tidende, Frøy Gudbrandsen, seier temaet for kveldens Aarebrot-forelesing er høgaktuelt, og viktig.
– Det er stor spenning, og tendensar til vekst i slike miljø fleire stader, noko som er veldig ubehageleg. Det er et riktig og viktig tema å ta opp i ei slik forelesing.
Ho gler seg til å høyre Hagtvet, som ho omtalar som ein dyktig formidlar, snakke om temaet. Gudbrandsen tykkjer også det er viktig å kvart år markere Frank Aarebrots formidlingsevner med ei minneforelesing.
– Aarebrot var ein inspirator, og som viste andre forskarar kor viktig det er å prioritera formidling.
Vi følger Aarebrotforelesningen minutt for minutt:
- Les også: