Tysdag ettermiddag er Fitjar lensmannskontor er historie. Talet på lensmannskontor og politistasjonar skal reduserast frå 340 til 225 etter politiet si nye lokale organisering.
Justis- og beredskapsdepartementet blei nyleg ferdig med behandlinga av kommunane sine klagar på politiet sitt forslag om organisering.
Fitjar har hatt lensmannskontor sidan 1866. I dag vart kroken på døra her den første synlege konsekvensen av den omfattande politireforma.
Svein Lunde har vore lensmann i Fitjar sidan 1991. No blir han politikontakt for Fitjar, Stord og Bømlo.
– Det er ein veldig spesiell dag, seier Lunde.
Frå lensmann til politikontakt
Etter kvart som lensmannskontoret på Fitjar har fått redusert bemanning, har anledninga og tida til å driva samarbeid med kommunen blitt mindre og mindre, fortel Lunde.
– Eg håpar me kan ta opp igjen ein del av det me har drive med før i tida.
Kommunane som misser sitt lensmannskontor vil få ein egen politikontakt.
Politikontakten skal vera leiinga sitt daglege kontaktledd med kommunane, og rådgivar innan kriminalitetsførebyggjande verksemd.
Ordførar i Fitjar, Wenche Tislevoll, er positiv til at lensmannen blir erstatta med ein politikontakt.
– Eg har stor tru på å få ein politikontakt her på huset, for då får me eit mykje nærare samspel med politiet. Og det gjeld kanskje spesielt med tanke på førebygging innanfor skule og helse.
Får behalda kontoret likevel
Justis- og beredskapsdepartementet blei måndag ferdig med behandlinga av kommunane sine klager på avgjerda om politiet si nye lokale organisering.
Desse kommunane får behalde lensmannskontoret sitt:
- Hemnes (Nordland politidistrikt)
- Stranda (Møre og Romsdal politidistrikt)
- Aurland (Vest politidistrikt)
Her er oversikta før klagebehandlinga.
I sin klagebehandling i mars avgjorde Politidirektoratet også å behalda lensmannskontoret i Årdal.
Nøgd med den nye politistrukturen
Politidirektoratet er godt nøgd med å få avklart den nye politistrukturen, etter klagane frå kommunane endeleg er behandla.
– Politidistrikta og våre medarbeidarar har venta på endeleg avgjerd. Vi er tilfreds med at resultatet i all hovudsak følger politidistrikta og Politidirektoratets vurderingar, seier politidirektør Odd Reidar Humlegård.
No kan politidistrikta starta arbeidet med å gjennomføra endringane i den lokale organiseringa.
– Samstundes skal stadig meir av politiet sin innsats den kommande tida handla om å utvikla måtar å jobba på som gir befolkninga betre polititenester, understrekar politidirektøren.