Dei pusta letta ut for eitt år sidan - no fryktar dei igjen å bli kutta

I ettermiddag kjem stortinget si innstilling til framtidas fylkesøkonomi. Det kan resultere i at tilbod som så vidt overlevde fylkeskommunen si førre kuttrunde, igjen kan stå for fall.

Ved Høyanger vidaregåande skule held dei nok ein gang pusten.

• LES OGSÅ: Frå tårer til glede i Høyanger

– Det gjer ein jo når ein høyrer om slike nedskjæringar, seier rektor Torill Thorbjørnsen.

Må sjå på nye kutt

Det small som ei bombe då regjeringa i førre månad la fram forslaget til ny kommunereform. Denne endrar også inntektssystemet for fylkeskommunane, og Sogn og Fjordane kjem dårlegast ut av alle .

• LES OGSÅ: – Dette finn eg meg rett og slett ikkje i, sa fylkesordførar Åshild Kjelsnes
• LES OGSÅ: Sogn og Fjordane fylkeskommune vi ha kompensasjon for inntektskutt

Skular som Høyanger vidaregåande, Dale vidaregåande og samferdsletilbod som Sognebåten kan igjen bli vurdert lagde ned dersom fylkeskommunen får 234 millionar kroner mindre dei neste åra.

• LES OGSÅ: Slik blir framtida for skulane

– Det er ganske opplagt at ein må sjå på skulestruktur og opplæring på nytt. For med slike dramatiske kutt, over 200 millionar kroner, så seier det seg sjølv at vi er nøydde til å snu alle steinar, seier fylkesordførar Åshild Kjelsnes (Ap).

Kutt vil komme

I kulissane blir det arbeidd hardt for å få redusert kuttkravet til fylket. I kommunalkomiteen på Stortinget sit Bjørn Lødemel (H).

Honndølen ynskjer ikkje å kommentere komiteen sitt arbeid, men er klar på at det blir langt mindre pengar til heimfylket.

• LES OGSÅ: Han fekk klar beskjed frå fylkesordføraren
• LES OGSÅ: Trur fylket kan håpe på mindre kutt enn det regjeringa foreslår

– Det er klart at då må fylkeskommunen inn å sjå på prioriteringar, seier han.

– Kva seier stortingsrepresentanten frå Høgre til tillitsvalde og elevar ved til dømes Høyanger vidaregåande?

– Eg har ikkje kommentar til dei konkrete kutta. Det eg jobbar med no er å finne best mogleg ordningar innanfor dei rammene som ligg i eit nytt inntektssystem for fylkeskommunen.

– Fleire kan kvi seg

Blir regjeringa sin sum på 234 færre millionar kroner ståande, fryktar fylkesleiar Trude Brosvik (KrF) at langt fleire enn berre fylkespolitikarane kan kvi seg.

Eit forslag som allereie har vakt stor harme, også utanfor fylket, er vinterstenging av Årdal - Tyin og Aurland - Hol .

• LES OGSÅ: Store protestar frå Austlandet - korkje Buskerud eller Oppland vil godta brøytekutt

– Dersom dei store kutta blir ein realitet over fem år, så er det mange som har grunn til å engste seg for tenester som fylkeskommunen er ansvarleg for, seier ho.

Vil kjempe for båten

I Balestrand fryktar Ap-ordførar Harald Offerdal ein ny runde om Sognebåten sin eksistens. Båtruta mellom Sogn og Bergen kostar fylket 12 millionar kroner i året.

– Kampen tek vi, og vi er i ferd med å førebu oss. Dette er ein viktig del av samferdsletilbodet vårt, og ikkje minst for turistnæringa som no prøver å utvide sesongen, seier han.

– Eg tenkjer både Sognebåten og bussruter. All kollektivtransport må under lupa, svarar Brosvik.

– Utmattande

Medan snøggbåten sine tilhengjarar bur seg på kamp, sit altså fleire vidaregåande rektorar med ei gryande kjensle av uro. Mellom anna Gro Fivelstad i Dale.

• LES OGSÅ: Fleire skular kan ryke når fylkeskommunen må kutte stort

– At ein ikkje blir ferdig med saka, men heile tida høyrer at det kan komme nye runder er utmattande både for tilsette og leiing, seier ho.

I Høyanger kryssar rektor Thorbjørnsen, elevar og tilsette det dei kan for at dei unngår å måtte gå igjennom ei ny kuttrunde.

– Det er først og fremst viktig for Høyanger som samfunn å behalde skulen. Skal vi få til nyskaping, så må vi kunne tilby ein vidaregåande skule. Det er viktig for folk som flyttar hit og det er viktige arbeidsplassar, seier ho.