Framleis over 20 kilometer saktegåande kø på E16: – Eg trur ikkje dette er normalt

Årets påskeferie går mot slutten, og mange har sete seg i bilen heimover etter å ha besøkt familie eller feriert på hytta.

Det har resultert i svært lange køar mange stader i landet.

På E16 mellom Voss og Bergen er køen klokka 23 over 20 kilometer lang.

Frå Stavenestunnelen og heile vegen til Indre Arna er det saktegåande trafikk og tidvis full stopp.

– Det går fortsatt sakte. Trafikken frå fylkesveg 49 i krysset på Trengereid har avtatt for lengst, men framleis er køane lange, seier trafikkoperøtør Oliver Hatland Iversen ved Vegtrafikksentralen i vest.

Han trudde at toppen var nådd i 20-tida, men vedgår at han tok kraftig feil.

– Det verkar å vera veldig mange som har tatt turen heim i dag. Det er svært mange bilar på vegen. Svaret får me vel i morgon, seier trafikkoperatøren før legg til.

– Eg trur ikkje det er normalt at det er kø frå Vaksdal til Arna klokka 23 på den nest siste dagen i påskeferien.

• NRK har sundag fått tilbakemeldingar frå fleire bilistar som har brukt fleire timar på strekninga mellom Evanger og Indre Arna.
• Klokka 21.50 startar køen ved Helletunnelen, 30 kilometer frå Indre Arna. – Køen står bom fast, skriv ein tipsar.

Trur påsketuristane har utsett heimreisa

Med knallvær og vårlege temperaturar venta Vegtrafikksentralen at mange ville utsetta heimturen til andre påskedag.

På mange av dei store utfartsvegane har køane difor latt venta på seg.

Slik er påsketrafikken kl 18.30 sundag kveld:

• E16 Hønefoss-Sandvika har stadvis saktegåande kø. Her må ein rekna med 25 min forseinking, ifølge Vegtrafikksentralen.
• Riksveg 7 Gol-Hønefoss har også stadvis saktegåande køar. Ein må rekna med opp til 20 min forseinking i trafikken.
• E18 Kragerø-Porsgrunn har stadvis saktegående kø. Her er det drygt 15 min forseinking.
• E16 Voss-Bergen: Saktegåande kø frå Stanghelle til Indre Arna. Store forseinkingar. Ein bilist NRK har snakka med har brukt halvannan time på i underkant av 20 kilometer.

– Meir trafikk enn venta

Difor kom den store kødanninga inn mot Bergen litt overraskande på, medgir Iversen.

– Det har vore meir trafikk enn forventa i dag. Det verkar som at folk byter litt på kva dag dei reiser heim. I fjor var mandagen verst, i år ser det ut til å bli sundagen. Svaret får me i morgon, legg Iversen til.

Påskehelga har vore prega av knallvêr i Sør-Norge. Også måndag 2. påskedag er meldingane gode for sol og varme i fjellet.

– Det er nok mange som utset heimreisa til måndag ettermiddag. Andre fryktar nok å stå fast i kø i morgon og velger difor å heller reisa heim i dag. Me ventar eit jamnt sig på vegane, seier trafikkoperatør Trude Lindstad ved Vegtrafikksentralen region øst til NTB.

Stengt tunnel skapte kø

Tidleg sundag ettermiddag blei Dalseidtunnelen på E16 stengd i ein lengre periode etter at ein bil mista eit hjul.

Iversen trur mange har utsett heimreisa sundag lengst mogleg.

– Ein del venta gjerne med å reisa ned på grunn av ulukka. I tillegg har finvêret kanskje gjort at folk har venta med heimreisa. Kombinasjonen gjer at køane heng litt igjen.

Forbi Vaksdal passerer trafikken i 40-50 km/t opplyser Iversen i 19.45-tida.

Men inn mot krysset på Trengereid, går det svært sakte sundag kveld. Bilane frå fylkesveg 49 som kjem frå Hardanger har forkøyrsrett.

Her er det heller ingen dirigering som sikrar at flettinga går smidig.

– Teoretisk sett skulle det nok ha hjulpe ein del frå dei som kjem frå Voss.

Ein fire mil lang kø er likevel ikkje heilt uvanleg.

– Det er nokså vanleg, i alle fall heim frå påsken. Det er nesten tilsvarande etter vinterferien og juleferien, men det er litt tilfeldig når det bygger seg opp.

I Vestland er det ingen andre stader med store kødanningar. Ferjeleiene Lavik-Oppedal ved Sognefjorden har kun minimalt med kø. Det same gjeld sambandet Halhjem-Sandvikvåg lenger sør i fylket.

– Ut frå dei bileta eg har sett var det verre i 19-tida. Eg håpar me har nådd toppen no, seier Iversen i Vegtrafikksentralen region vest klokka 19.50.