Frå klokka 17 fredag ettermiddag vert fylkesveg 53 stengd ved Finnsåstunnelen. Berre naudetatane slepp forbi den rasutsette strekninga på hovudvegen inn til Årdal.
– Det er større fare for ras når vi har mildvêr. Høgare temperaturar gjer at steinar har losna frå fjellsida, seier Bjørn Indrebø i Statens vegvesen.
Fram til vegen stengjer fredag ettermiddag har Vegvesenet vaktar ståande ved Finnsåstunnelen.
– Vi har vakthald ved rasområdet. Vakta slepp ein og ein bil forbi i opningstidene fram til vi stenger, seier Indrebø.
Geolog skal vurdere rasfaren på laurdag
Laurdag morgon klokka 08 skal ein geolog undersøke fjellsida. Håpet er vegen kan opne att då, seier Indrebø.
– Det er meldt lågare temperaturar frå laurdag av, då er det mindre fare for at det vil rase.
Statens vegvesen jobbar med å rassikre vegen. Vegstenginga får ikkje konsekvensar for dette arbeidet.
– Dei jobbar ikkje i rasområdet no, men førebur seg til å få på plass den permanente sikringa, så dette vil ikkje få konsekvensar, seier Indrebø.
Området ligg inne i Vegvesenet sin rassikringsplan. Eit nytt nett vil hindre at ein vil måtte stenge vegen like ofte.
– Når vi får opp den permanente sikringa, så vil den stogge denne typen steinar.
- Les også:
- Les også: