Lastebileigar:- No må det skje noko

- Det er ein viktig ting styresmaktene må bli betre på, og det er strengare kontrollar på grensa, seier Øren som er leiar i Lastebileigarforbundet i Sogn og Fjordane.

To nestenulukker same dag

Han har sett seg lei på at det stadig vekk oppstår farlege situasjonar, utforkøyringar og ulukker der utanlandske vogntog er involvert.

Seinast torsdag førte to dårleg skodde utanlandske vogntog til farlege situasjonar på vegane i Sogn og Fjordane.

I Sogndalsdalen køyrde ein latvisk semitrailer seg fast på glatta, og vart ståande i motgåande køyrefelt.

Sjåføren fekk då ei bot på 11.000 kroner fordi han ikkje hadde gode nok dekk eller nok kjettingar.

• LES OG: Vogntogsjåfør fekk 11.000 i bot

Same kveld slapp alle involverte med skrekken etter at ein lastebil vart skvisa i grøfta av ein utanlandsk semitrailer. Semitraileren, som ifølgje folk på staden hadde dårlege dekk og køyrde utan kjetting, hadde køyrd seg fast og stod på tvers i vegbana.

Då lastebilen bak prøvde å køyre forbi byrja semitraileren å skli inn i vegen og klinte seg til slutt heilt inntil lastebil som enda i grøfta. Ikkje langt utfor brøytekanten går fjellsida stupbratt ned i eit djupt gjel i dette området.

• LES OG: Skvisa i grøfta av semitrailer

(Artikkelen held fram under biletet)

- Bilane skulle aldri kome så langt

Likande situasjonar skjer med ujamne mellomrom på vintervegar over heile Norge. Den norske lastebilnæringa har lenge meint at problema kan reduserast.

Kravet om strengare kontroll av dekk, kjettingar og anna utstyr på utanlandske vogntog har vore eit samla krav i fleire år.

• LES OG: Krev strengare grensekontroll

- Desse bilane skulle aldri ha kome seg til verken Hemsedalsfjellet eller Sogndalsdalen med slikt utstyr, seier Øren.

Norsk Transportarbeidarforeining meiner i tillegg at oppdragsgjevarane må ta ansvar for at utanlandske vogntog er godt skodde.

• LES OG: - Norske bedrifter har ansvaret

Men oppdrettsnæringa vil ikkje ta det ansvaret.

• LES OG: Oppdrettarar vil ikkje ta ansvar for utanlandske vogntog

(Artikkelen held fram under videoen)

Mange farlege situasjonar

Øren og resten av den norske transportnæringa er byrja bli utålmodige, og håpar styresmaktene snart opnar auga og forstår alvoret med å kontrollere vogntoga på grensa.

- Det går for seint, rett og slett, seier lastebileigaren oppgitt.

Han meiner det er for seint når vogntog som ikkje er godt nok skodd først vert kontrollerte når dei til dømes kjem til Statens vegvesen sin kontrollstasjon på Håbakken i Lærdal.

- Det er mange mil mellom Svinesund og Lærdal, for å ta det som eit eksempel. Kor mange nestenulukker og farlege situasjonar oppstår ikkje i løpet av den turen?

- Vi gjer så godt i kan

Allereie i 2006 lova dåverande samferdsleminister Liv Signe Navarsete at kontrollen ved grenseovergangane skulla bli betre.

• LES OG: Lovar tøffare linje mot farlege vogntog

Men seinast i haust gav Lastebileigarforbundet uttrykk for at ting ikkje har endra seg i praksis.

- Det har ikkje blitt følgt opp godt nok, sa administrerande direktør Olav Slaatsveen til NRK den gong.

På same tid sa Vegdirektoratet at dei gjer så godt dei kan for å kontrollere vogntog som kjem frå utlandet over grensene til Norge.

- Vi gjer så godt vi kan ut frå dei rammene vi har. Det er ein realitet at vi ikkje maktar å stoppe alle køyrety som til ei kvar tid er på vegane, sa rådgjevar Arne Valdemar Nielssen i november.

• LES OG: Vegvesenet vil ha strengare krav til dekk
• LES OG: - Førarane våre er engstelege

- Fortvilande

Øren seier det stadig vert arbeidd for å få til betre kontrollar på grensa, og håpar at det skjer noko snart.

- Det er fortvilande for alle involverte at det ofte skjer ting på vegane på grunn av utanlandske vogntog som ikkje er førebudde på vintervegane i Norge, seier Øren.