- Nettsaka vart oppdatert 23. april klokka 13.50 med korrekt tal for daude fuglar. I den opphavelege saka stod det 137.000 daude fuglar.
Trekkfuglane har nett kome attende til Noreg, og kan ha drege med seg virus frå Europa.
I tillegg går hekkesesongen i gang utover våren.
– Då er vi spesielt opptekne av hekkande sjøfuglkoloniar, seier Ragnhild Tønnesen.
Ho er seniorforskar i virologi ved Veterinærinstituttet, og har fjorårets store utbrot av fugleinfluensa friskt i minnet. Smitta gjekk spesielt på måsearten krykkje. Til saman vart det melt inn 24.000 daude fuglar.
– Må vere årvakne
Høgpatogen fugleinfluensa vart første gang påvist i Noreg i 2020. Sidan har sjukdomen teke livet av villfugl over store delar av landet.
Ein fersk statusrapport frå Veterinærinstituttet viser positive tal til no i 2024. Det er færre tilfelle av fugleinfluensa enn tidlegare år, og det har ikkje vore påvist smitte i Noreg sidan februar.
Men vi er no inne i ein del av året som kan snu på det heile.
Difor ber ekspertane folk om å vere årvakne.
Det var i hekkande sjøfuglkoloniar at ein i fjor sommar fann store utbrot i Finnmark. Ein smittevariant, som var svært tilpassa sjøfugl, klarte å halde seg gjennom sommaren.
– Slik var det ikkje tidlegare, så det er eit nytt mønster. Vi kan ikkje avskrive at det vert slik i år også. Vi må vere årvakne, seier Tønnesen.
Optimisme
Bente Fjermestad-Eie seier Mattilsynet vil følgje nøye med etter meldingar om fugleinfluensa.
Foto: MattilsynetFramover held Mattilsynet eit godt auge på innmelding av daude fuglar, både gjennom eiga innmeldingsside, frå Veterinærinstituttet og Miljødirektoratet. For dei veit at smitten er der.
– Det er veldig viktig at vi følgjer med om situasjonen skulle eskalere, seier Bente Fjermestad-Eie, veterinær og seniorrådgjevar ved seksjon dyrehelse ved hovudkontoret.
Ho oppmodar publikum, som er på tur, om å oppføre seg normalt, og varsle Mattilsynet om sjuke eller daude fuglar.
– Og så må dei som driv med fuglehald ikkje senke skuldrene sine med tanke på smittevern. Fugleinfluensa sirkulerer blant ville fuglar heile året.
Flinke på smittevern
Landbruksdirektør hjå Statsforvaltaren i Vestland, Christian Rekkedal, held seg foreløpig roleg.
– Eg er ikkje meir uroa enn ein skal vere om våren før fuglane kjem nordover.
Fugleinfluensaen kan også råke tamfugl. Sjølv om det vart påvist fjøssmitte i Rogaland i februar, meiner han kommersielle aktørar er flinke til å verne om fjøsane sine.
Men også dei med ein liten flokk frittgåande høns er utsette.
– Trekkfuglane kan finne det lagleg å stoppe der, for mat eller anna. Då er ein meir utsett.