– Det viktigaste vi tok opp var behovet for ei buffersone mellom oss og Oppland. Jervegrensa bør eigentleg følgje Ottadalsføret, seier Distad, som er leiar for rovviltnemnda i region 1.
Då rovviltnemnda for region 3, altså Oppland, endra forvaltningsplanen i 2012, flytta dei sona for fire ynglande jerv vestover, nærmare grensa til Sogn og Fjordane. Det er den grensa Distad vil flytte tilbake austover.
– Jerven kjenner ikkje grenser. Han går inn i Sogn og Fjordane og gjer skadar. Det er ein heilt uhaldbar situasjon, som ikkje kan halde fram.
I år har sauebøndene i indre Sogn opplevd svært store tap. Spesielt Naddvik beitelag mellom Årdal og Lærdal er hardt råka.
– Må følgje opp rovviltforliket
Distad nytta møtet på onsdag til å påpeike dei store tapa i indre Sogn. Rovviltnemnda meiner det var for mange jervar i Sogn og Fjordane i vinter og ved beitestart, og seier det var ein umogleg situasjon.
– Forvaltningsplanen for Sogn og Fjordane og fylka sør for oss er klar på at det ikkje skal vere rovdyr som kan gjere skade. Men forvaltningsplanen på austsida, i Oppland, tillèt jerv heilt inn mot grensa til Sogn og Fjordane, seier Distad.
– Skal ein oppfylle rovviltforliket frå Stortinget må det gjerast tiltak som reduserer jervebestanden i Sogn og Fjordane og grenseområdet, seier han.
Fryktar mange vil gje seg
Distad fryktar at tapa av sau i år vil gjere at mange vil vurdere om dei kan fortsetje i næringa.
– Det vil vere heilt katastrofalt. Sauenæringa er utruleg viktig i Sogn og Fjordane og veldig viktig i indre Sogn. Beitenæringa skal ha prioritet. Då må me ha ei forvaltning som oppfyller det Stortinget har bestemt, seier han.