Koronafaste surfarar reiser i staden til Stad

– Det er så mange surfarar her no. Eg var å surfa her for ei veke sidan, og det var rundt 30 menneske i vatnet, seier Magnus Bettum Flatebø.

Han driv ein surfebutikk i bygda Ervik på Stad i Vestland. Vanlegvis pleier han å surfe i utlandet på denne tida av året («eg tykkjer vinteren her er så lang»), men i år har han pent vore nøydd til å vere heime.

I nabobygda driv Torkild Strandvik Stad Surfing. Han har observert det same.

Det som pleier å reise til «Portugal, Marokko og liknande» når nettene blir lange, kjem i staden til Stad.

– Det er nok fordi det er reiseforbod, seier han.

Fleire som tar til bølgjene

Same trend gjev seg til kjenne andre plassar i landet, seier redaktør i surfemagasinet SurfNorge, Morten Solberg.

– Vi var i Lofoten for ein månad sidan, og det er langt fleire surfarar i vatnet der også enn det pla å vere på denne tida på året.

Han legg òg merke til at det er mange nybegynnarar ute i bølgjene.

– Eg trur det heng saman med at folk er mykje heime og har tida til å gjere forsøk på noko dei ikkje har prøvd før.

Solberg syns det er fint at fleire nytta seg av naturen, men fleire folk i vatnet kan bety kamp om bølgjene, seier han.

– Det er viktig med opplæring i regler og etikette for å unngå ulukker.

– Vi har plass til fleire

I sommar var det smekkfullt i Hoddevik, den mest populære surfestranda på Stad.

Frykt for koronasmitte, forsøpling og avføring gjorde at kommunen sette allemannsretten til side og innførte eit forbod mot «villcamping».

Men no er ordførar Alfred Bjørlo (V) berre glad for alle dei tilreisande.

– Eg synst det er kjempebra at fleire surfarar vel norske surfestrender også i vintersesongen. Det er eit mål for oss å utvide turistsesongen i Nordfjord også til vinterhalvåret – og denne nye trenden er då midt i blinken, seier han.

Fjordabladet skriv at kommunen tiltrekker seg nye innbyggarane. Ein av faktorane til at folk frå Austlandet og Canada busette seg på Stad var surfebølgjene.

Marita Lindvik er leiar i Visit Nordfjord. Ho viser til at det er ein uttala strategi for Nordfjord å bli eit reisemål heile året – ikkje berre deler av det.

– Vi oppfordrar alle til å følge dei nasjonale smittevernråda. Men lar det seg gjerne å reise, finst det nok av vakker natur å boltre seg på i Nordfjord, seier ho.