Kjøper like mange traktorar som før

Denne våren har vi blitt vitne til bønder som er sintare enn aldri før. Tilbodet frå Staten i landbruksoppgjeret vart skildra som eit skambod, og bønder over heile landet aksjonerte for å vise si misnøye.

Dei ville ha meir igjen for å lage mat og nekta å godta ei lønsutvikling dei meiner ikkje er god nok.

Men trass pessimisme og krav om betre økonomi, bøndene i fjordfylket sluttar ikkje å bruke pengar. Medan det i mai vart selt langt færre traktorar på landsbasis, har bøndene i Sogn og Fjordane kjøpt like mange.

Nøgd med utviklinga

Ein av dei som har lagt merke til denne trenden er regionsjef i Felleskjøpet, Dag Arne Helle. Han har registrert at medan salet av dyre traktorar flatar ut og går ned i resten av landet, så held salstala seg gode i Sogn og Fjordane.

– Vi har hatt god respons, og vi ser at mange har tru på ei framtid i landbruket. Både salstala og utviklinga vår viser det, og det er veldig flott, seier Helle til NRK.no.

Dette er kanskje overraskande, sidan bøndene i vår har hevda at økonomien er så dårleg at det ser mørkt ut for heile næringa.

• LES OGSÅ: Brudd i jordbruksforhandlingene
• LES OGSÅ. Bøndene kan eigentleg ikkje streike
• LES OGSÅ: Kjøpte 50 brød for å hjelpe bøndene

Men det må bli betre

Sjølv om Helle ser at salstala held seg oppe, er han likevel heilt klar på at noko må gjerast for å få opp investeringsviljen i landbruket.

Den må opp på eit høgare nivå, meiner han.

– Det er slitsamt både for barnefamiliar og andre som skal rekrutterast inn i landbruket, dei må investere store summar. Ein traktor er ein liten del, kanskje må ein bruke 10 millionar på å investere i ein driftsbygning, seier Helle.

• LES OGSÅ: - Ap viser arroganse mot bøndene
• LES OGSÅ: Bøndene takka nei til 300.000 kroner per årsverk

Blanding av nødvendigheit og optimisme

Leiar i Sogn og Fjordane bondelag, Per Hilleren, trur at gode salstala for traktorar er eit symbol på at nokre bønder vel å vere optimistar.

Det sjølv om dei også kjenner på dei dystre utsiktene for sin eigen og andre bønder sin økonomi.

– Det er jo ein optimisme blant ein del som ønskjer å satse. Samtidig er dette nødvendige investeringar. Bøndene må fornye driftsapparata sine, dei kan ikkje la vere, seier Hilleren til NRK.no.

• LES OGSÅ: Bønder stengde fjellovergang - vart truga med pryl
• LES OGSÅ: Bøndene stengde Utvikfjellet