Jakob (17) blei lokka av å sjå på dei aller beste

I eit smekkfullt treningslokale i Naustdal følgjer trenar Gunnar Reiakvam nøye med på løftinga til Jakob Endestad. 17-åringen er ein av dei nyaste tilskota i Tambarskjelvar, den beste vektløftarklubben i Norge.

Som klubb- og landslagstrenar har Reiakvam solid erfaring med å jobbe med store talent. No kjenner han seg trygg på at han har funne eit nytt.

– Jacob er ein fantastisk flott type. Han har fysikken i orden, er rask å springe, spenstig og tek teknikken veldig lett. Han kan bli ein fantastisk god vektløftar, om han berre bestemmer seg for det.

Frå hobby til satsing

Eit halvt år etter EM i vektløfting i Sunnfjord, blomstrar det godt i det lokale vektløftarmiljøet. Før, under og etter meisterskapen vart det lagt ned mykje innsats i å spreie kunnskap og interesse for idretten.

• Les også: Ein slik gymtime har dei ikkje hatt før
• Les også: Her startar dei å verve frivillige

Jakob Endestad hadde med seg heile familien på dugnadsarbeid under meisterskapen, og på løfteskulen i etterkant av EM vart han biten av basillen.

– Eg har drive med styrketrening sidan åttandeklasse, så eg har trent ei god stund. Men eg har ein del å hente på teknikken, seier 17-åringen.

Vann NM på første forsøk

Under Reiakvam sine venger har nykomlingen alt fått testa kreftene sine. På NM i vektløfting 5-kamp for tre veker sidan vann Endestad like godt heile greia.

– Det var uventa, men kjekt, gliser han.

I 5-kamp konkurrerer utøvarane i vektløftarøvingane rykk og støt, i tillegg til 40-meter med liggande start, kulekast bakover og stille hopp med samla bein. Reiakvam meiner NM-sigeren berre er starten for den unge utøvaren.

– Når du blir best i landet i 5-kamp, så viser du at du er ein fantastisk god idrettsmann.

• Les også: EM-arrangørane får skryt frå presidenten

Blir spådd lysande framtid

Sjølv har ikkje Endestad kome så langt at han har sett seg dei store måla. Iallfall ikkje enno. Han er mest oppteken av at det er moro å trene.

Reiakvam sin spådom om at Endestad kan nå like langt som medaljegrossistane Vebjørn Varlid og Sindre Rørstadbotnen, får fram eit stort flir hos den unge løftaren.

– Eg veit ikkje heilt eg. Eg begynte jo litt seinare enn dei med vektløfting, men vi får sjå kva som skjer, flirer 17-åringen.

Reiakvam er uansett sikker i si sak.

– Eg er heilt sikker på at han kan bli minst like god. Det er eg ikkje det slag i tvil om.