Innfører totalforbod mot open eld

Årsaka til eldforbodet i kommunane Vik, Balestrand, Leikanger, Sogndal og Luster er tørt gras som tidlegare har teke fyr gjentekne gonger både i Sogn og andre stader.

I mars månad var det registrert heile 24 gras-, lyng- og skogbrannar. I same månad i fjor var det berre registrert éin slik brann. No vil brannvesenet i Sogn unngå at fleire slike brannar oppstår, og har difor lagt ned totalforbod mot open eld frå torsdag av.

– Vi vil ikkje ha slike situasjonar som det har vore i Hordaland og Rogaland dei siste vekene med mykje gras- og lyngbrannar. Vi har også registrert at det på kysten også har vore ein del brannar. No er det slik at det er frykteleg tørt. Vi har også hatt ein lokal grasbrann her i Sogndal, så no handlar det om å vere førebyggande, seier varabrannsjef i Sogn brann og redning IKS, Vidar Trettenes.

• LES OGSÅ: Til no i mars har det vore 24 bråtebrannar i Sogn og Fjordane.
• LES OGSÅ: Den tørraste vestlandsvinteren sidan 1964
• LES OGSÅ: Kjempa mot flammar under snøen

Kan bli forbode fram til hausten

Han meiner det tørre graset gjer det ekstra viktig å vere føre var.

– Det generelle bålforbodet som gjeld frå 15. april til 15. september er ikkje begynt endå, og no må vi vere litt i forkjøpet før det kjem ei større regnskur som kan gjere at vi opphevar forbodet.

Det kan faktisk bety at det ikkje vert lovleg med bruk av open eld i dei fem kommunane før i september, dersom ikkje regnet kjem før 15. april.

• LES OGSÅ: Bråtebrann kom ut av kontroll
• LES OGSÅ: Brannvesenet fekk sløkt bråtebrann i Sogndal

– I teorien er det slik, og når snøen er smelta i tillegg, så vil det også vere utfordringar der dersom det held fram med tørt og fint vêr. Vi må også ta omsyn til det generelle skogbrannvarselet, seier Trettenes.

Kan søkje om enkeltløyve

Trass i totalforbodet er det likevel mogleg å få enkeltløyve. Spørsmål om dette må meldast inn til vakthavande same dag på telefon 482 96 929. Ifølgje Trettenes er det store lokale forskjellar, noko som vil vere avgjerande for om ein får løyve eller ikkje.

• LES OGSÅ: Fekk 7000 i bot etter bråtebrenning
• LES OGSÅ: Mister du kontroll på brannen kan du i verste fall hamne i fengsel

– Det er veldig lokale forskjellar, det kan vere heilt greitt ein plass, og ugreitt ein annan stad sjølv om det er i same kommunen. Der det er snø overalt, som på Hafslo, så vil overordna vakt sannsynlegvis gi løyve, men ein person på Leikanger vil truleg få nei.

– Vert det ofte innført totalforbod?

– Det er nok litt spesielle forhold. Det er jo framleis ein del snø, men det har vore tørt lenge, og vi hadde jo ei sak ute i Høyanger ved ei hytte der det brann under snøen, så vi vil rett og slett vere litt førebyggande her, seier Trettenes.

• LES OGSÅ: Bråtebrann ute av kontroll i Askvoll - brann i terrenget i Bremanger
• LES OGSÅ: Håpar å få kontroll før mørket senkar seg