Gladmelding frå meteorologane: – Stormane er over, og kulden er tilbake

Stormane er over, og kulden returnerer.

Det er gladmeldinga frå meteorologane.

– Heile landet får ein vinterleg vêrtype i løpet av veka, fortel statsmeteorolog Marek Ratajczak ved Meteorologisk institutt.

– Sjølv om enkelte stader får litt vind, så er det generelt ikkje snakk om meir enn kuling på det meste, legg han til.

Minusgrader, sol og snø

Denne veka kan du dermed ta skiturane som nedbørsmengdene og vinden hindra deg i å ta sist veke.

Oppmodinga frå meteorologane likevel å følgje med på snøskredfaren.

I korte trekk blir det minusgrader over det ganske land. Og det blir periodar med snø, og periodar med sol. Minst minusgrader blir det lengst sørvest.

– Vi snakkar ikkje om sprengkulde som vi har hatt tidlegare i år. Det blir meir vanlege vintertemperaturar, seier Ratacjzak.

Det betyr tosifra kuldegrader fleire stader, kanskje 20–30 blå grader for dei som bur utsett til. Som i dalstroka.

– Det får dei ofte når det er slik vêrtype midt på vinteren. Det blir ikkje snakk om 40 minus som i starten av året, seier statsmeteorologen.

Mindre skade enn frykta

Vêrmessig har det vore ein trå start på 2024, med farevarsel, flaum, jordskred og kraftige vindkast.

Og i slutten av førre veke: orkan.

Ekstremvêret «Ingunn» trefte ikkje kysten like langt sør som først varsla, men gjorde stor skade.

Søndag melde forsikringsselskapa om kring 1000 skademeldingar. Det er likevel færre enn dei frykta.

Såleis kan den komande veka vere eit kjærkome pusterom. På toppen av det er mørketida over for dei fleste, og dagane blir merkbart lengre.

– Eg vil tru at det er fleire som tykkjer det er på tide med ein litt rolegare vêrtype, seier Ratacjzak.

Eine stormen avløyste den andre

Også meteorologane i Tromsø set pris på rolegare arbeidsdagar.

– Den eine stormen var ikkje ferdig før den neste kom. Det var veldig travelt på jobb, og ekstra mannskap som måtte stille på alle dagane, seier statsmeteorologen.

Kuldegradene vil kvile over landet i ei vekes tid. Så slår det om att, om ein skal tru langtidsprognosane. Eit høgtrykk ser ut til å bygge seg opp rundt Storbritannia.

– Det vil dra med seg mild luft frå sør, frå Atlanterhavet og Middelhavsområdet. Men det er langt fram i tid, så det er uvisst kor høgtrykket legg seg og kor langt nord det kjem, seier Ratacjzak.

– Kan det få turbulente vêrfølgjer?

– Kanskje ikkje nødvendigvis storm, men ein kan få mildvêr og større nedbørsmengder.