– Ut frå alvoret i denne saka, syns me det er rett å sjå på kva helsehjelp han har fått, seier fungerande fylkeslege i Vestland, Sjur Lehmann, til NRK.
Måndag kveld rykka politiet ut til ei leilegheit i Ibsens gate i Bergen, etter melding om ordensforstyrringar. På staden møtte dei ein 39 år gamal mann som budde i leilegheita. Inne i leilegheita skal det ha brunne.
Ifylgje politiet oppstod det ein konfrontasjon mellom politiet og mannen. Han skal ha hatt kniv på seg.
Politiet fyrte av fleire skot inne i leilegheita. Mannen blei treft. 39-åringen døydde seinare av skadane.
Har vore innlagt på Sandviken
Mannen har tidlegare vore innlagt på det psykiatriske sjukehuset i Sandviken i Bergen. Det er i dag Fylkeslegen har bedt om å få henta inn mannen sin journal derifrå.
Saka er også meldt Helsetilsynet.
Fire politifolk mistenkt
Tysdag heldt politiet pressekonferanse om skytinga.
– Dette er ei tragisk sak. Eg vil på vegner av politiet uttrykka medkjensle for etterlatne. Det er forferdeleg når nokon dør av det politiet gjer, men me veit at nokon gonger kan det skje, sa politimeister i Vest politidistrikt, Kaare Songstad, då.
Saka vert etterforska av Spesialeininga for politisaker.
Tidlegare onsdag skreiv BT at mannen skal ha vore åleine då politiet rykka ut til leilegheita hans.
Det bekreftar Spesialeininga for politisaker til NRK.
– Avdøde var aleine i denne situasjonen. Spesialeininga har ingen opplysningar eller haldepunkt på at det var andre personar involvert i sjølve hendinga, seier Ellen Eikeseth Mjøs, etterforskingsleiar ved Spesialeininga for politisaker i Vest-Noreg.
Ho bekreftar også at hendinga skjedde i inngangspartiet i leilegheita til mannen som døde.
– Det var fire polititenestepersonar som var involvert i sjølve hendinga, seier ho.
De fire politifolka har status som mistenkt i saka, ifølgje Mjøs.
Familien i sjokk
Mannen sin familie har framleis mange spørsmål dei lurar på, og håpar Spesialeininga si etterforsking skal gje mest mogeleg svar.
– Foreldra er i sjokk og i djup sorg etter de fekk beskjed om dødsfallet, seier dei pårørande sin advokat, Kjetil Johannes Ottesen, til NRK.
Spesialeininga har gjort avhøyr av dei fire politifolka som var på staden. I tillegg har gjer dei avhøyr av sivile vitne og personar frå dei andre naudetatane.
Dei går også gjennom lydloggar frå politiaksjonen, og har fått etterforskingshjelp frå Kripos.
– Vi er i ferd med å danne oss eit godt bilde av det som skjedde i oppgangen, seier Mjøs frå Spesialeininga.
Den tredje på halvtanna år
På eitt og eit halvt år har norsk politi skote og drepe tre menn med bakgrunn frå psykiatrien.
I august 2019 vart ein mann skoten av politiet på Jaren på Hadeland. AMK hadde bede politiet om bistand.
I august i år hende ein liknande situasjon på Bolkesjø i Notodden. Også der enda det med at politiet skaut og drap ein mann.