Uroa for å bli omringa av kraftliner

Området er alt prega av fleire store kraftliner, og grunneigarane har kjempa ein lang kamp i rettsapparatet mot eit ulovleg fatta vedtak av staten.

No fryktar grunneigar Lars Endre Myklebust at det skal kome endå fleire kraftliner.

– Det er eit hardt belasta område. Eit kvart tiltak vil forringe enno meir, seier han.

• Les også: Grunneigar om Statnett: - Dette er maktmisbruk!
• Les også: Datalagringa i Lefdal Gruve vil trenge straum tilsvarande ein norsk by

(Artikkelen held fram under biletet)

Fryktar fleire inngrep

Blant tiltaka dei fryktar er ei ny stor line som skal forsyne Ytre Nordfjord frå den nye store transformatoren i Myklebustdalen, og som er konsesjonssøkt av NVE. Dessutan kan datasenterbygginga i Lefdal på lang sikt skape eit enormt straumbehov, kanskje med ein eigen sjøkabel i Nordfjorden frå Ålfoten til Lefdal.

• Les også: No startar bygginga av datasenteret

Lars Endre Myklebust fryktar grenda skal bli skjemma av alle inngrepa, og meiner dei to prosjekta burde vore sett i samanheng med kvarandre av SFE.

– No greier eg ikkje å sjå for meg korleis dette tiltaket vil sjå ut. Men ei auke blir det og det er langt frå ønskjeleg, seier han.

Myklebust meiner SFE, som er medeigar i Lefdal gruve-prosjektet, burde tatt høgde for datasenterplanane då dei planla den omsøkte luftlina mot ytre Nordfjord.

– Dette er informasjon SFE må ha kjent til, seier han.

Treng ikkje frykte luftliner

Men nettdirektør i SFE Asgeir Aase meiner han kan roe grunneigarane på Myklebust. Han seier den ytre lina ville ha kome uansett.

– Den står på heilt eigen kjøl og skal forsyne Ytre Nordfjord. Det er den billegaste og enklaste måten å gjere det på og har ikkje noko med Lefdal Gruve å gjere i det heile. Men det er mogleg å forsyne Lefdal med denne lina, dersom det skulle bli behov, seier Aase.

Han seier det kan bli aktuelt med ein eigen sjøkabel som kryssar Nordfjorden frå kraftverka i Ålfoten til Lefdal, om datasenteret blir stort nok. I tilfelle skal straumen hentast frå Åskåra/Øksenelvane sin transformator som ligg ved sjøen, og seier ein ikkje treng å frykte fleire luftliner.