Daglegvarekjedene varsla allereie før jul at maten kom til å bli langt dyrare i 2023.
No vil Frp ha ein debatt om importvernet som vernar om norske landbruksprodukt. Målet er å gjere handlekorgene billigare.
– Utan importvernet vil norske matvareprisar gå ned. Det er noko fleire utgreiingar har synt oss dei siste 10 åra, seier Sivert Bjørnstad (Frp), som sit i næringskomiteen på Stortinget.
Tysdag møtte han Senterpartiet til dyst i Politisk kvarter.
Konkurransedirektør Tina Søreide i Konkurransetilsynet sa til E24 tidlegare i veka at ho meiner det er unødvendig dyrt å importere visse matvarer til Noreg.
Det er eit syn Bjørnstad støttar fullt ut.
– Importvernet er ein av dei viktigaste grunnane til at vi i dag har høge matvareprisar og at vi har eit dårlegare utval i butikkane, seier Bjørnstad.
Den raudgrøne regjeringa vil jobbe for å styrke norsk matproduksjon, noko som også kjem klart fram i Hurdalsplattforma. Det skal skje gjennom kvotar og toll på varer som kjøt, ost og mjølk frå utlandet.
– Sjølvforsyning er viktig
Koronapandemi og krigen i Ukraina har fått mange til å meine at sjølvforsyningsgraden i Noreg må opp.
I 2020 berekna Norsk institutt for bioøkonomi NIBIO sjølvforsyningsgraden i Noreg til å vere 46,5 prosent.
Éi av dei som vil ha sterke murar rundt norsk matvareproduksjon, er Turid Vange. Ho har teke over familiegarden og driv med mjølkebruk i Vik i Sogn.
– Å fjerne murane vil vere ei svært kortsiktig løysing, i alle fall om vi òg tenker på mattryggleiken her til lands.
Bonden i Vik meiner importvernet er viktig for å sikre produksjonen av mjølk og kjøt i Noreg, og at det er viktig å vere mest mogleg sjølvforsynte med mat.
Ho ser difor ikkje lyst på konkurranse frå utlandet.
– For vår del så vart prisen på mjølka vi leverer redusert frå årsskiftet. Økonomien i dag er ikkje mykje å skryte av. Så skulle det bli endå dårlegare, ja, då veit eg ikkje.
Vil snu alle steinar
– Vi må snu alle steinar. Dette er ikkje tida for å halde på heilage kyr, seier Bjørnstad (Frp).
Då er han «meir uroa for dei som i dag slit med å betale for matkorga».
– Eg trur norske bønder klarar å tilpasse seg på same måten som bøndene i Finland, Sverige og Austerrike har gjort dei siste ti åra.
Like optimistisk på bondestanden sine vegner er ikkje leiar i Næringskomiteen, Willfred Nordlund (Sp).
Villfred Nordlund (Sp) er leiar i Næringskomiteen på Stortinget.
Foto: Sigurd Steinum / NRK– Eg kjenner fleire bønder både i Sverige og Finland. Biletet som vert forsøkt teikna her om at det går så godt, det stemmer rett og slett ikkje.
Han seier at alle land prøver å produsere så mykje mat som mogleg til eiga befolkning.
– Og då vert importvernet svært viktig, med tanke på norsk kostnadsnivå og korleis Noreg ser ut.