Fekk hovudrolle i nobelprisvinnaren sin opera

– Det er ei ære å få vere med på ei verdspremiere på ein opera med Jon Fosse sin tekst. Det gler eg meg veldig til, seier Frank Kjosås.

Våren 2025 er det verdspremiere på operaen Asle og Alida i Grieghallen i Bergen.

Bak ideen står operasjef Eivind Gullberg Jensen på Bergen Nasjonale Opera. Då han blei tilsett, fekk han vite at det var pengar til å tinge ein ny opera. Og valet var lett.

– Som målmann ligg Jon Fosse mitt hjarte nært. Me møttest på Kaffistova, og eg merka Jon tende på ideen, seier Gullberg Jensen.

Fall på Trilogien

Møtet på Kaffistova skjedde fleire år før Fosse fekk Nobelprisen i litteratur i 2023.

Gullberg Jensen fortalde det ikkje var lenge sidan han hadde lese Triologien, og at det hadde gjort inntrykk.

– Då sa han, då lagar me ein opera av det, seier Gullberg Jensen.

Kjærleikshistoria til Trilogien, handlar om dei to fattige tenåringane Asle og Alida som seglar inn til byen Bjørgvin.

Frank Kjosås har rolla som Åsleik.

Operasjefen i Bergen håpar og trur det heile vil bli godt motteke:

– No har vi denne nobelpriseffekten, som framleis gjeld. I tillegg er handlinga delvis rett opp i gata her. Så eg tenkjer at dersom ein nokon gong skal gå på ei urframføring, ei verdspremiere av ein opera, så er det no ein skal gjere det.

Har aldri sunge opera

Den etterspurde skodespelaren har spelt i ei rekkje musikalar, men opera blir ei ny utfordring.

– Det har eg aldri gjort før. Eg har hatt songpedagogar og teaterlærarar som meinte at dette skodespelargreiene måtte eg berre slutte med, og heller gå ei klassisk retning, seier Kjosås.

Han fann skodespeleriet, og der har han møtte Jon Fosse sine tekstar og omsetjingar.

Han meiner at Fosse sine tekstar er slike som skodespelarar kan lese, og så kan dei det med ein gong.

– Jon Fosse er tekstleg slik som Ingrid Bjørnov er musikalsk. Når du les det, så kan du det. Alt er klart – heile rytmen ligg der, seier Kjosås.

– Men opera blir ganske annleis songmessig enn det du er vant til?

– Ja, eg har teke kontakt med songpedagogane mine, og må nok ha nokre timar før vi set i gang her.

Ser fram til utfordringa

Kjosås er frå Øystese, 3,3 mil frå Strandebarm – der Jon Fosse vaks opp.

Han er utdanna ved Teaterhøgskolen, og gler seg til å ta fatt på oppgåva i operaen. Han trur han skal klare det på ein god måte.

Musikken er laga av Bent Sørensen.

– Eg gler meg mest til å bli kjent med musikken, og å kunne flytte inn i partituret og librettoen. I tillegg til å bli kjend med alle som skal vere med, seier Kjosås.

Han innrømmer han at det blir litt artig å kome heim til Vestlandet.

– Og blir det skarre-r eller rulle-r?

– Eg har skarra i heile mi skodespelar- og songkarriere, utanom på teaterskulen. Der var eg austlending i tre år. Men eg tilpassar meg – det er jobben min, seier Kjosås.