Feira tunnelen med jazz og bunad

Ein delegasjon med ordførar Martha Finden Halset i spissen er på plass framfor Stortinget. Med seg har dei også eit dixieorkester for å skape munter jazz-stemning.

Målet med turen er å vise at dei er utruleg nøgde med at Vikafjellet omsider er inne på Nasjonal Transportplan (NTP). Ordførar Marta Finden Halset (Ap) har teke fram sitt finaste plagg denne dagen.

– Dette er ein historisk dag for Vik. I årevis har vi brukt alle tenkelege argument for å få tunnel og no er vi inne på transportplanen. Det har vore ein lang kamp, men i dag er det berre glede. Vi er også glade for at det er tverrpolitisk einigheit om dette vedtaket, seier Halset.

16 kilometer lang tunnel

50 år med knallhard kamp blei krona med siger då det i midten av april blei klart at det ligg inne 100 millionar kroner til oppstart av ein tunnel gjennom Vikafjellet.

Innbyggjarar og politikarar i Vik har kjempa for ein 16 kilometer lang veg gjennom Vikafjellet. Også næringslivet i dei kringliggjande kommunane har kravd tunnel på den mest stengde riksvegen i landet.

• LES OGSÅ: Etter 50 år lang vegkamp kunne vikjene sleppe jubelen laus
• LES OGSÅ: Vikjene heiste flagga til topps over heile bygda i rein glede

(Artikkelen held fram under videoen)

Håper å komme med første periode

I dag er det stor stemning i hovudstaden og ein gjeng på over 100 personar jublar i lag. Politikarar har kome ut og nysgjerrige turistar lurer på kva som skjer midt i hovudstaden.

Gunn Randi Bjørnevoll frå Vik er også med på turen. Ho er strålande nøgd med dagen.

– No håper og trur vi at tunnelen kjem med i første perioden i transportplanen.

– Kor stort er det at vikjenen endeleg får tunnel etter ein lang kamp?

– Vi har ofte vore stengde inne om vinteren. Vi veit aldri når vegen blir stengd. Tunnelen blir ikkje viktig berre for Vik, men for heile Sogne-regionen, seier ho.

• LES OGSÅ: Dei borgarlege partia kjempar samla for tidleg oppstart for Vikafjellstunnel
• LES OGSÅ: Her kan dei juble for vegpengar