– Vi er sterkt prega av denne hendinga, seier sjef ved Borgund kraftverk, Magne Netland.
Ein feil ved kraftverket førre veke førte til at vassføringa i Lærdalselvi gjekk kraftig ned.
Då personellet skulle sette i gang aggregatet som sørger for vasstilførsel til elva, blei det full stopp.
Feilen skjedde onsdag kveld kl. 18.30 og den kjende lakseelva fekk synleg lågare vasstand fleire stader.
Først i 3–4-tida om natta hadde Lærdalselvi normal vassføring.
No vedgår Borgund kraftverk at det har skjedd ein menneskeleg svikt, men at dei ikkje har kome fram til kva årsak som ligg bak.
– Det er ein rutinesvikt i forbindelse med igangsetting av aggregata våre ved Borgund kraftverk, seier Netland.
Massegrav av død yngel
Den låge vassføringa i den kalde elva gjekk hardt utover yngelen som gøymer seg på botn av elva.
– Når det skjer så brå endringar, så strandar han. Vi er redd det er ein betydeleg mengde yngel som no har døydd, seier Ola Petter Bøe i Lærdal elveeigarlag.
Det er framleis for tidleg å seie kor mykje av yngelen i den kjende lakseelva som har døydd, men fleire stader i elva er det dokumentert yngel som flyt opp ned.
Dronninga blant lakseelvar
Lærdalselvi blir ofte kalla «Dronninga blant lakseelvar».
Dronningnamnet kjem av at Kong Harald fiska i elva frå han vart 14 år gamal og både Kongen og Dronning Sonja har vore faste gjestar i dei fleste åra det har vore fiske i elva.
Lærdalselvi har og blitt ein populær destinasjon for fleire sportsfiskarar.
I fjor blei det fiska 240 fisk i elva, der laksen som vart fanga hadde eit snitt på 6,8 kilo.
Politiet vurderer etterforsking
Førebels har ikkje elveeigarlaget meldt Østfold Energi til politiet etter skadane elva og yngelen har fått.
Men politiet i Sogndal har sjølv byrja å sjå på saka.
– Vi har ikkje starta etterforsking enno, men vi ser på saka og vurderer om vi vil starte etterforsking, seier Sondre Lillebostad, straffesaksansvarleg for politiet i Sogn.
Borgund kraftverk vil vere samarbeidsvillige om politiet startar etterforsking.
– Vi kjem til å hjelpe til politiet slik at jobben deira blir så enkel som mogleg, seier Netland.