– Snøbyer kan gje vanskelege køyreforhold på fjellovergangane. Dette gjeld frå seint i kveld og ut dagen i morgon, seier meteorolog Trond Torsteinson.
Skal du ta turen mellom vest og aust med bil, så kan det vere greitt å sko seg til eit møte med snødekte vegar på fjellovergangane.
Meteorologisk institutt har sendt ut eit OBS-varsel for heile Sør-Noreg om snø i høgfjellet. Frå tidleg torsdag til tidleg fredag er det venta 60 til 80 mm nedbør i Sogn og Fjordane, medan det er venta mellom 70 til 100 mm i både Rogaland og Hordaland.
– Det kjem ein del nedbør. I dag kjem store delar som regn i første omgang. Snøgrensa har så vidt byrja å falle, men det er først i kveld at nedbøren kjem som snø i fjellet, seier Torsteinson.
Sko deg på snø
Det blir ikkje berre grått og vått dei neste dagane. Allereie no kan fleire sjå fjell med kvite toppar.
– Det blir snøbyer ned mot 1000 meter, seier Torsteinson.
Prognosane for Strynefjellet, Sognefjellet og Vikafjell viser at det blir nedbør i form av snø og lave temperaturar. Meteorologen er ikkje i tvil om kva han vil råde bilistane til.
– Bilistar bør absolutt sko seg om ein skal over fjellet.
SNØGRENSA KRYP NEDOVER: Frå Panoramavegen er det utsikt innover mot Nordfjorden der snøen ligg på nokre av fjelltoppane.
Foto: Rune Fossum / NRKRegn i låglandet
Sjølv om det ikkje er fare for snø i låglandet, blir det ein del regn og vind for oss som ikkje skal ta turen over fjellet til Austlandet.
Noregs vassdrags- og energidirektorat (NVE) har auka flaumvarselet til nest høgste nivå.
– Det er relativt store nedbørsmengder som no kjem. Lokalt kan vi få store øydeleggingar, seier regionsjef i NVE, Brigt Sandal.
Sandal oppmodar alle til å halde eit ekstra auge med røyr og sluk.
– Pass på at vatnet får flyte der det skal flyte, og at rusk og rask ikkje ligg i vegen.
- Les også:
