– Det er ikkje uvanleg at det kjem snø i april, men folk er alltid like overraska. Folk er innstilt på at våren er her, seier statsmeteorolog Aslaug Skålevik Valved.
Frå søndag kveld til måndag kveld er det mykje snø i vente. I låglandet kan det lokalt koma mellom 5 og 15 centimeter snø i laupet av desse 24 timane i Vestland, Møre og Romsdal og Trøndelag. I høgda kan det koma meir.
– Temperaturen fell ganske brått på sundagen. I Bergen sentrum kan det vera 5–6 grader på føremiddagen, så kan det koma ned mot – 2 på berre nokre timar, seier meteorologen.
Sidan snøen kjem bygevis, er det vanskeleg å vita akkurat kor mykje snø som kjem kvar. Sidan lufta er ganske ustabil, kan det også koma torden og hagl.
Om snøvêret er det sendt ut gult farevarsel.
– Det er fordi det ser ut til å leggja seg, også i låglandet. Og så tar me omsyn til kvar me er i sesongen, seier Valved.
Kriteriet for å senda ut gult farevarsel er elles at det kjem mellom 5 og 25 centimeter snø i ytre strok.
Ikkje berre eit blaff
Ikkje berre ser det ut til at snøen som kjem mot slutten av helga ser ut til å kunna leggja seg. Det kan også koma snø litt av og på lenger ut i neste veke.
– Det er ikkje nødvendigvis berre eit lite blaff, men det er litt tidleg å koma med detaljar, seier meteorologen.
Snøen kjem fordi det er ein kald luftstraum frå nord som iallfall varar til onsdag.
– Ikkje bruk slutten av påsken til å leggja om til sommardekk. Det kan ein venta litt til med, seier Valved.
Og akkurat det var det kanskje ikkje så mange som tenkte på i Trondheim i dag. Der har snøen allereie kome.
Frå sundag kveld til måndag kveld kan det også koma ein del vind i tillegg til snø i fjellet. Det kan skapa snøfokk på heimreisedagane.
– Ein må smørja seg med tålmod, seier Valved.
Kraftige bølgjer kjem frå Svalbard
Den kalde luftstraumen gjer også at bølgjene som kjem nordfrå får god tid til å byggja seg. Dei kjem heilt frå Svalbard til dei treff kysten. Bølgjene ser ut til å verta sterke særleg måndag og tysdag.
– Om ein har fått båten ut i påsken er det lurt å fortøya den ekstra godt. Ikkje legg ut i småbåt, særleg måndag. Det er store krefter i sving og mykje drag i sjøen, seier meteorologen.