Prisane blei delte ut under ein utseld Luttpris-fest med rundt 600 personar i salen.
Her kan du sjå dei musikalske innslaga:
Luttprisen er delt ut sidan 2006, men dette var siste gongen prisane blei delte ut for Sogn og Fjordane som eige fylke.
– For ein fantastisk fest dette blei for musikken i Nordfjord, Sunnfjord og Sogn, sa programleiar Arianhrod Engebø og prosjektleiar Stian Sjursen Takle under det direktesende showet.
Alle vinnarane får stipend på 25.000 kroner frå eigarstiftingane frå Sparebanken Vest og Sparebanken Sogn og Fjordane.
Årets artist
Luttprisen som årets artist var det Erlend Apneseth frå Jølster som fekk. Juryen kallar han både ein tradisjonsberar og ein totalmodernist i bruken av hardingfele.
Albumet Salika, Molika, som kom ut i 2019, er Erlend si sjette plate og hans tredje i konstellasjonen Erlend Apneseth trio.
– Med Salika, Molika befestar Erlend Apneseth trio sin posisjon med nytenkande, spennande og fengjande musikk i kryssingspunktet mellom folkemusikk, jazz og samtidsmusikk. Plata har fått strålande kritikkar og har allereie mottatt NOPA-prisen og blitt nominert til Folkelarmprisen, meiner juryen.
Årets nykommar
Luttprisen til årets nykommar gjekk til VILNES frå Atløy. Det har verkeleg tatt av for den hardtarbeidande musikaren i 2019.
Han har spelt på store og mindre arenaer, gjort eit stort tal konsertar og han har fått mykje radiospeling for låtane sine, mellom anna i Noregs største radiokanal NRK P1. Av ein britisk radiokanal blei han også kåra til «Årets mannlege artist».
Årets blest
For første gong blei Luttprisen til årets blestdelt ut laurdag. Denne prisen skal gå til ein person som har gjort ein ekstra innsats for å løfte musikarane frå fylket.
Denne prisen gjekk til Inge Ronny Kvåle frå Sogndal. Grunngjevinga er at han i ei årrekkje har gjort ein formidabel innsats for musikklivet i fylket som produsent, musikar, låtskrivar og arrangør utan å stille seg sjølv i fremste rekke. Han har eige platestudio, har spelt i ei mengd band og har samarbeidd med ei rekkje andre musikarar, både amatørar og profesjonelle.
– Han gjer det mogleg for musikarar å spele inn musikken sin, han arrangerer store og små konsertar for å løfte dei fram, han spelar sjølv ei mengd strengeinstrument, han skriv låtar, lagar musikk til TV og han jobbar i kulturskulen, skriv juryen.
Siste gong frå Sogn og Fjordane fylke
Dette var den siste gongen Luttprisen blei delt ut for Sogn og Fjordane fylke. Tidlegare har artistar som Eva Weel Skram, Kjartan Lauritzen, Sigrid Moldestad, Thea Hjelmeland, Karl Seglem og Good Time Charlie fått Luttprisen.
I juryen sat Pål Fidjestøl, Elise Hessevik, Tore Dvergsdal, Hilde Bjørkum, Øyvind Lyslo, Kristin Sandal, Stein Aase, Ivar Bruvik Sætre, Andreas Macsik og Jan Inge Fardal.
Her kjem alle musikkinnslaga frå Luttprisen:
Her kan du sjå intervju med vinnarane: