Med klar røyst instruerer Gunnar Reiakvam unge vektløftarar i treningsrommet i Naustdal. Enno har landslagsløftarane litt tid til å bu seg på det som vil bli karrierehøgdepunktet til no: EM på heimebane.
Men oppladinga til meisterskapen i Sunnfjord har teke den verst tenkelege vendinga. I går vart det kjent at ein av dei største norske profilane, Ruth Kasirye, hadde testa positivt på stoffet meldonium.
- Les også:
Med norske rekordar i både rykk, støt og samanlagt i fire av sju vektklassar på kvinnesida, samt EM-sølv og EM-bronse har ho vore eit førebilete for mange.
For resten av den norske troppen var meldinga svært tøff å få.
– Vi hadde ein veldig trasig dag i går. Dette var ikkje det slag moro for nokon, vedgår landslagstrenar Gunnar Reiakvam alvorstyngd.
Ruth Kasirye var sjølv tydeleg prega då ho i går la seg flat i møte med media. Ho seier sjølv at ho fekk i seg stoffet i samband med medisinsk behandling då ho vart sjuk med malaria i Uganda.
- Les også:
Prøvar å sjå framover
Fem av 12 utøvarar i den norske troppen løftar for arrangørklubben Tambarskjelvar. Dei og resten av landslaget er skjerma frå media om saka. Reiakvam legg ikkje skjul på at ungdomane har hatt behov for å snakke om det som har skjedd.
– Vi brukte dagen i går til å bearbeide dette. No må vi konsentrere oss om det sportslege og prøve å ikkje tenke negative tankar, seier trenaren.
– Merkar du det på gjengen at dei er prega?
– I går var ein veldig tung dag. Vi har snakka ein del om det og bestemt oss for at vi skal gå vidare og vise at vi ikkje kan bli sette ut av noko slikt.
Jobbar for ein rein sport
Tamás Aján, president i Det internasjonale vektløftarforbundet (IWF), skulle gjerne vore dopingsaka forutan.
– Dette er ei stor utfordring for vektløftarsporten, som er utsett for doping. Men alle idrettar kan vere utsette, difor jobbar vi kontinuerleg for ein rein og rettferdig sport, seier han til NRK.no.
- Les også:
Håpar å snu det negative
Trenar Reiakvam vedgår at situasjonen er svært uheldig. No vil han jobbe hardt for at løftarane skal halde fokus fram mot løftinga neste veke.
– Dei har bestemt seg for å yte sitt beste, og det trur eg kjem til å skje. Alle er i god form, så eg håpar dei får det ut også, seier han før han held fram med å finpusse på teknikken til utøvarane.