Cruiseturistar kan få sykkelveg – skuleborna må vente

– Det er litt ekkelt når bilane køyrer fort forbi. Det er ikkje alltid dei ser meg, fortel Amalie Omland (11) med bilduren i bakgrunnen.

I 30 år har bygda Stårheim i Nordfjord med kring 650 innbyggarar kjempa for ein trygg skuleveg.

Trafikken på Riksveg 15 dundrar forbi i 80 kilometer i timen.

Her reiser tunglasta vogntog med fisk frå Måløy eine vegen, og turistbussar på veg til naturskjønne Stadlandet den andre. Over 3.000 biler i snitt i døgnet.

Langs autovernet går skuleborna.

– Eg tar nokre telefonar til ungane. Og det gjer eg kvar dag for å sikre at refleksvesten er på plass, fortel firebornsmor Reidun Ytre-Hauge Ivesdal.

Amalie, Jonathan (11) og Peder (12) har sjølve skrive avisinnlegg i Fjordenes Tidende om at dei gruar seg over å gå denne vegen til skulen.

Cruise-gjestar på sykkeltur

Lenger aust ligg kommunesenteret og cruisebygda Nordfjordeid. I fjor tok dei i mot 30 cruiseskip og over 125.000 passasjerar her. I år ventar 72 skip.

Stadig fleire av turistane vil på sykkeltur langs fjorden. Om lag 700 i år, ifølgje næringa sjølv.

Det vart eit avgjerande argument for lokalpolitikarane etter at dei i september bad kommunen møte Statens vegvesen for å få sykkelveg mellom Nordfjordeid og bygda Haugen. Ei strekning der det ikkje går eit einaste skulebarn.

To e-postar og eitt møte seinare hadde dei fått svar frå den mektige vegetaten.

Første steg på vegen til sykkelveg kunne kome allereie i år, eller neste år.

Det tok tre månadar.

På Stårheim har dei enno ikkje fått noko slik lovnad.

For tidleg fase

– Det er for tidleg fase til å stille dei to prosjekta opp mot kvarandre, seier seksjonssjef Tone Anette Espe i Statens vegvesen.

Vegønskene er mange og pengesekken er berre så stor. Ingen av prosjekta kan bli bygd i løpet av dei neste åra.

Men har det eine prosjektet fått eit forsprang når det er lovd ein reguleringsplan, medan det andre ikkje har det?

– Eg har full forståing for at det blir oppfatta slik. Så jobbar vi vidare med våre prosjektlister og vil fortløpande sette i gong planlegging når vi får høve til det, seier Espe.

Ordførar Gunnar Silden (V) meiner at ny skuleveg på Stårheim er prioritert, men at somme mål er lettare å oppnå.

– Det er enklare for oss å få regulert eit prosjekt på 800 meter enn dei seks kilometerane på Stårheim, seier han.

Håp for framtida

Den eventuelle sykkelvegen frå sentrum vil kanskje bli kring 800 meter. Ved Stårheim kan det vere snakk om fleire kilometer.

Amalie har tankar om kva som kunne gjort skulevegen hennar tryggare.

– Eg ønskjer meg eit gangfelt og busskur. Og litt lys.

– Trur du det kjem?

– Kanskje i framtida.