Bryggen i Bergen fekk sykkelveg – benkar, blomar og bosspann blei borte

– Me tenkte me skulle sitte på benkane her borte og kose oss. Sjå litt utover sjøen og prate litt. Men så ser eg at det er jo ikkje benkar her lenger. Så det er jo trist, seier Kjetil Vestfossen.

For, skulle ein sitte ved bryggekanten på Bryggen måtte ein gå langt. Eller heller sykle langt. Det er nemleg laga plass til sykkelveg.

Då den raude stripa var ferdig i oktober i fjor, var tida også ferdig for bryggekant-benkar.

Eva Prestgård opplever at det er trongt om plassen på Bryggen. Ein som sykla forbi, meinte ho måtte flytte seg, fordi sykkelvegen berre var for syklande.

– Men, det var så vanskeleg å kome fram her borte, så me måtte diverre gå litt ut i den sykkelstien, og han fauk av garde. Han blei sint, seier Eva Prestegård.

Trongt om plassen

For å forklare kvifor benkar, boss og blomar er vanskeleg å få plass til, må ein forklare det enkelt. Det er nemleg fleire involverte partar.

• Bergen kommune eig Bryggen.
• Dei ytste tre metrane leiger kommunen ut til Bergen Havn.
• Då Vestland fylkeskommune laga sykkelveg, tok dei nokre meter, og brått var det ikkje plass til verken benk, blomar eller boss.

Båtar og skip treng plass til landgang, av- og på-lasting og tidvise skipsdåpar.

Reiselivsdirektør Anders Nyland i Visit Bergen, meiner både benkar, bosspann og blomar trengst langs Bryggen.

Han håper på løysing.

– Dette trur eg er eit klassisk døme på at nokon har gløymt å snakke saman. Nemleg kommune, fylkeskommune og hamnestell, seier Nyland.

Står lagra på rekke og rad

Michal Forland er hamnedirektør i Bergen Havn. Før nasjonaldagen sa han at han håpa på at dei skulle finne ei løysing saman med kommune og fylkeskommune.

– No er det ikkje forsvarleg med tanke på kai-aktivitetane våre med fortøying, landgangar, og syklistar som då skal, i teorien, fyke forbi på denne nye sykkelstien, å sette ut pottene eller benkane, sa Forland.

Alle benkane stod då lagra ein heilt annan stad i byen, nemleg på Møhlenpris.

Bosspanna stod også lagra.

Lovar handling

Eivind Nævdal-Bolstad, finansbyråd i Bergen kommune fekk saka på bordet tysdag 14. mai. Han satsa på å få til eit handlingsmøte med Bergen Havn før 17. mai.

– Hamnesjefen og eg skal ha ei felles synfaring og sjå om det i alle fall er mogleg å setje ut nokre benkar som verken er til fare for syklistar, gåande eller båttrafikken som skal legge til hamn her, sa Bolstad.

Han ville ha benkar ut så fort som mogleg.

– Eg har allereie sendt bilete til hamnesjefen og sagt kor eg tenker at det kan vere mogleg å få ut dei benkane som bør på plass, seier han.

– Og han veit kor benkane er?

– Det veit han, og han er klar så lenge han får lov av kommunen og ikkje må krangle for lenge med fylket. Dette må me berre fikse, seier Nævdal-Bolstad.

Naudløysing?

Kort tid etter byråden blei intervjua, blei fire benkar sett fram igjen til nasjonaldagen. Som ei slags naudløysing.

På den eine plassen kan ein no kvile med ryggen mot sjøen, eller mot Bryggen.

Den andre staden med benkar er heilt, heilt ytst på Bryggen.

Dei andre benkane er framleis på vent.