– Målet er å komme på landslaget og slå Johannes. No må han passe seg, seier Aksel Mathias Meland den lovande skiskyttaren til NRK.
– Kor mange år treng du før det er realistisk?
– To til tre, svarar han.
Han har nettopp tatt sitt første NM-gull i juniorklassen, men tidlegare har han vunne fleire nasjonale renn i ungdomsklassane. Då NRK snakka med han var han på veg til Rådhusplassen i Oslo, der han skal få gullmedaljen sin.
Ekstrem forvandling
Likskapen mellom Meland og Johannes Thingnes Bø er mange. Dei kjem begge frå Stryn, går for same klubb og dei har hevda seg godt i yngre klassar.
I tillegg har begge renn der ingenting stemmer, før det plutseleg snur dagen etter. For på sprinten i går vart Meland nummer 19, etter å bomma på fem av dei ti skota på skytebana.
– Det må vera noko med lufta i Stryn, seier Meland.
– Eg tenkte ikkje på det då eg stod på start i dag. I dag følte eg at eg hadde full kontroll på skytinga, seier Meland, som revansjerte seg med å skyte 19 av 20 treff på normaldistansen.
Like mange treff som Thingnes Bø, som tok sølvet på seniorane sin normaldistanse.
I mål var Meland 11,3 sekund betre enn Jo Brøste Nørstegård som tok sølvet, men ut på sisterunden leda han med over halvminuttet.
– Sisterunden var heilt jævlig. Eg visste at eg leda og eg klarte å samle nok krefter til å halde unna. Det er det mest krevjande løpet eg har gått nokon gong, seier Meland, og fortel at det var blaut og tung snø i løypene i Holmenkollen.
Sterke lokale prestasjonar
Men Meland var ikkje den einaste frå fylket som hevda seg. Som nemnd tok Johannes Thingnes Bø sølvet på seniorane sin normaldistanse, medan Førde-løparen Håvard Gutubø Bogetveit tok bronsen.
Fullstendig resultatliste over alle dei lokale deltakarane som var med ligg på arrangøren sine heimesider (ekstern lenke).
NM vert avslutta søndag med stafettar.