Det hevdar tillitsvald for sjukepleiarane ved Nordfjord sjukehus, Oddlaug Lyslo, overfor Fjordabladet.
Avisa skriv at Helse Førde sitt framlegg inneber at det berre skal vere ei 20-prosentstilling som anestesisjukepleiar ved sjukehuset.
Ville presisere
Etter å ha fått fleire spørsmål om omstillingsarbeidet og utviklingsprosjektet «Framtidas sjukehus» på Nordfjordeid, sendte Helse Førde ut nokre presiseringar fredag.
Mellom anna står det at «Akuttberedskapen vil bli ivareteken ved anestesilege og medhjelpar som skal vere spesialsjukepleiar, m.a. anestesisjukepleiar. Sjukehuset skal ha spesialtrena stabiliseringsteam for akutte alvorlege tilstandar og skadar».
- LES OGSÅ:
– Den pressemeldinga meiner eg er misvisande, med omsyn til at anestesiberedskapen skal takast i vare av mellom anna anestesisjukepleiarar. Det er snakk om ei 20 prosentstilling, noko som går imot Norsk standard for anestesi og vedtak som helseføretaksmøtet gjorde 20. april i fjor om at «den indre medisinske akuttberedskapen ved Nordfjord sjukehus skal vere som i dag», seier Lyslo til NRK.
Skal lærast opp
Ifølgje avisa skal det altså vere anestesilege 24 timar i døgnet, sju dagar i veka, ved sjukehuset. I tillegg skal legen ha hjelpepersonell.
Lyslo opplyser til Fjordabladet at Norsk standard for anestesi inneber at det ved generell og regional anestesi alltid skal vere to anestesiutdanna til stades. Gjennom Nasjonal helse- og omsorgsplan vedtok Stortinget at lokalsjukehus som i dag har etablert ein anestesiberedskap, skal vidareførast med dette.
Sjukehuset har i dag seks anestesisjukepleiarar og Lyslo reagerer kraftig på at desse ressursane skal utnyttast ved å bli redusert til 20 prosent.
- LES OGSÅ:
Ifølgje Helse Førde skal andre sjukepleiarar lærast opp til å vere anestesilegen sine medhjelparar.
– Ein anestesisjukepleiar går eit og eit halvt år på skule for å lære anestesifaget. Då finn eg det underleg at andre sjukepleiargrupper kan lærast opp på nokre få dagar, seier Lyslo til NRK.
Pilotprosjekt
Lyslo poengterer at sjukehus i Eid er eit pilotprosjekt for Framtidas sjukehus.
Ho skildrar det som tragisk dersom leiinga ved sjukehuset bankar igjennom framlegget frå administrasjonen.
- LES OGSÅ:
– Vi skal leggje standarden for andre lokalsjukehus i landet. Det betyr at dersom dette går igjennom i Helse Førde, så vil det kunne gå igjennom andre stadar i landet. Då er den profesjonen utvatna, avsluttar ho til NRK.
