Norsk Hydro på Rafnes.
Direktør for Hydro Polymers på Rafnes, Leif Hellebø, seier at nyheiten blei teken imot med stor glede av dei tilsette.
- Dette er svært viktig for bedrifta, seier han.
Produksjonen i den nye klorfabrikken er planlagt å starte i 2005. Og det inneber at produksjonskapasiteten på Rafnes blir fordobla til 260.000 tonn.
I dag er den petrokjemiske produksjonen i Bamble basert på import av store mengder klor, som er ei viktig råvare i framstillinga av plastråstoffet PVC og mellomproduktet VCM. Det nye anlegget skal i første omgang erstatte importen av og gjere Hydro Polymers i Grenland sjølvforsynt med klor.
- Planane om å selje petrokjemiverksemda står ved lag, men uansett er det viktig for oss å take vare på og utvikle dei verdiane som ligg her, seier generaldirektør i Hydro Eivind Reiten.
Vil sikre petrokjemisk industri
Generaldirektør Eivind Reiten
Han seier også at investeringa er viktig av miljøgrunnar, og at den er viktig for å sikre grunnlaget framtida for den petrokjemiske industrien i Grenland, uavhengig av eigarforhold.
- Det nye anlegget er basert på den best tilgjengelege teknologien. Utsleppa til luft, medrekna CO2, vil ligge på same nivå som dagens fabrikk trass i at produksjonen blir fordobla, seier Reiten.
Men produksjonsauken får ikkje konsekvensar for bemanninga ved Rafnes.
- Denne investeringa vil gjere oss meir konkurransedyktige. For i dag er vi avhengig av å kjøpe klor frå andre, og marknaden for klor i Europa er blitt mykje strammare den siste tida, seier direktør for Hydros petrokjemiverksemd Anders Hermansson.
Han seier at transport av store mengder klor i form av mellomproduktet EDC til Rafnes er veldig kostbart og lite attraktivt på sikt.
