Betaler over ein halv million for ei teneste som ikkje fungerer

I fjor brukte fylkeskommunen 560.000 kroner på skuleskyssen med tog for dei vidaregåande elevane frå Drangedal.

I år stig kostnaden med fire prosent.

Turen går mellom Drangedal, Lunde og Bø, men det er sure pengar å betale når toget ikkje går.

Då Go Ahead tok over togdrifta i 2019, var toga over 82 prosent punktlege. I fjor var dei nede i knappe 65 prosent.

– Som alle andre som betaler, så forventar du jo at du får det du betaler for. Eg må innrømme at eg blir ganske irritert, seier fylkesordførar i Telemark, Sven Tore Løkslid.

Ventar i timevis

Det går føre seg eit togopprør på Sørlandet. Folk stoler ikkje på at toget kjem når det skal, og for mange er det slutt på tolmodet.

– For elevane dette gjeld er toga den beste transporten. At toget ikkje går i 2024 blir eg berre oppgitt over, seier Løkslid.

Forseinkingane på Sørlandsbanen har blitt så mange at elevar risikerer å stryke i fleire fag på grunn av høgt fråvær.

– Det har vore nokre dagar eg ikkje har kome meg på skulen. Då tapar eg mykje, seier Tarjei Håstul Flom.

Saman med fleire andre er han avhengig av tog mellom Drangedal og Lunde for å kome seg til skulen.

– Det lengste eg har sete og venta er rundt tre timar, seier han oppgitt.

Beklagar

Fylkesordførar Sven Tore Løkslid seier det er beklageleg overfor elevane.

– Vi skal fortsetje å trykke på, både mot Go Ahead og Jernbanedirektoratet for å få dette opp å gå igjen. Dette er rett og slett ikkje haldbart.

Administrerande direktør i Go Ahead, Emil Eike innrømmer at selskapet står i ein vanskeleg situasjon.

– Det er krise, og vi beklagar til elevane. Det er feil på infrastruktur, trafikkavvikling på eit veldig belasta system, og det er tog som ikkje går som dei skal.

Han meiner løysinga er å saumfare banen.

– Vi må sjå på Sørlandsbanen med lys og lupe, og rette opp i dei infrastrukturfeila det er mogleg å gjere noko med på kort sikt. Vidare må vi sjå på ruteplanen om vi kan justere han slik at han blir meir robust. Det siste er å jobbe tett saman med Mantena som held toga ved like og Norske tog som eig dei, seier han.