Irans president omkom i helikopterstyrt

Irans visepresident Mohsen Mansouri stadfestar på X at presidenten er død. Også utanriksministeren og dei andre som var om bord i helikopteret er døde.

Natt til måndag blei helikopteret lokalisert av ein tyrkisk drone, nær grensa til den aserbajdsjanske eksklaven Nakhitsjeva.

Visepresident Mohammad Mokhber er utpeikt som fungerande statsleiar, fram til det er venta nytt presidentval.

Ifølge den iranske grunnlova, må nytt val haldast innan 50 dagar.

Full forvirring

President Raisi var i Aserbajdsjan søndag morgon for å innvie ei demning saman med den aserbajdsjanske presidenten Ilham Alijev.

Fleire andre høgtståande tenestemenn skal ha vore med i følgjet.

Lenge var det uklart om helikopteret til den iranske presidenten faktisk hadde styrta.

Iransk TV meldte først at eitt av tre helikopter i følgjet hadde vore utsett for ei ulukke, i nærleiken av byen Jolta, nær grensa til den aserbajdsjanske eksklaven Nakhitsjeva.

Den iranske innanriksministeren Ahmad Vahidi sa søndag at eitt helikopter hadde hatt ei hard landing, men sa ikkje noko om at presidenten var i helikopteret.

– Vi ventar på fleire detaljar, sa han då.

Ein aktor i Tehran åtvara i går om å publisere falske nyheiter om det sakna helikopteret.

«Nokre mediefolk» spreier falske nyheiter om helikopteret, og desse har fått åtvaringar frå påtalemakta, skriv Al Jazeera.

Iransk TV hevda tidlegare søndag kveld at helikopteret var funne. Men iranske Røde Halvmåne, som deltok i søket, nekta for dette.

Leiaren for Irans Raude halvmåne, Pir Hossein Kolivand, sa tidlegare at situasjonen såg dårleg ut då redningsmannskapen såg helikopteret på rundt to kilometers avstand.

Ein tenestemann sa tidlegare i natt til Reuters at vraket var heilt utbrent.

Krevjande leiteforhold

Gjennom kvelden og natta søndag gjekk det føre seg ein omfattande leiteaksjon under vanskelege vêrforhold og med dårleg sikt.

Fleire iranske medium melde om kraftig regn og ein del vind i området kor helikopteret styrta, og det iranske nyheitsbyrået Fars skreiv først at helikopteret måtte naudlande på grunn av dårleg vêr og tåke.

– Først sa styresmaktene at det var ei hard landing. Deretter sa dei at det var ei ulukke og no seier dei at det er ein helikopterstyrt, seier NRK-journalist Sidsel Wold.

Krevjande leiteforhold førte til at det nesten var umogleg å søke på vanleg vis, fortel ho.

Fleire ville hjelpe

Stabssjefen for dei væpna styrkane i Iran gav ordre om at alle ressursar skulle bidra i søket. Samtidig stilte fleire land seg til disposisjon.

Både Irak og Aserbajdsjan sa dei ville bidra i leiteaksjonen.

– Som nabo, ven og broderland står Aserbajdsjan klare til å tilby hjelp, seier presidenten i landet.

Tyrkia sende 32 spesialtrente redningsarbeidarar for å hjelpe til i søket. Både Russland og Dei foreinte arabiske emirata sa også dei ville hjelpe, om nødvendig.

Presidenten i USA, Joe Biden, er også orientert om saka.

Held fram som før

Den øvste leiaren i landet, Ali Khamenei, har gått ut og bede folk om å ikkje uroe seg for styret i landet.

Ifølge den iranske regjeringa vil leiinga av landet halde fram «utan stans», melder Reuters.

Søndag kveld leia visepresident Mohammad Mokhber krisemøte i regjeringa.

Avdøde Raisi har vore president sidan 2021, etter at han vann presidentvalet med lågast deltaking i Den islamske republikken si 45 år lange historie.

Uttrykker støtte

Den indiske statsministeren Narenda Modi skreiv måndag på X at han var djupt sjokkert og trist etter den tragiske ulukka. Vidare skriv han at India står ilag med Iran i dette.

Den russiske ambassaden i Teheran og Libanons Hizbollah kondolerer også, ifølge Reuters.

Også Hamas seier dei sørger over Raisis død, og hyllar «støtta hans til frigjering av Palestina». Assad-regimet i Syria uttrykker «solidaritet» med Iran etter presidentens død.

Måndag ettermiddag uttrykta også utanriksminister Espen Barth Eide sine kondolansar til dei råka, skreiv han i ein e-post til TV 2. På Twitter skriv utanriksministeren at han er sjokkert.

Spent situasjon

Raisi var konservativ og har tidlegare leia landet sitt rettsvesen.

– Han står den øvste leiaren i Iran nær. Dersom han er omkomen eller ute av stand til å styre må det bli skrive ut nyval om 50 dagar, seier Wold.

Dei siste åra har Iran vore prega av protestar mot det autoritære regimet, utløyst av dødsfallet til 22 år gamle Mahsa Amini i 2022, då ho sat i varetekt hos iransk moralpoliti.

Dødsfallet førte til den største opposisjonsbølga i landet på fleire år, og sjølv om protestane har minka, er mange iranarar imot leiinga i landet.

Iran og Israel vore i ein såkalla skuggekrig dei siste åra. Tendensen er at dei angrip kvarandre i tredjeland. Men etter at krigen mellom Hamas og Israel braut ut, har konflikten eskalert.

Ifølge den iranske grunnlova, skal visepresidenten overta stillinga som mellombels president, og nye presidentval skal haldast innan 50 dagar.