USA meiner Russland brukte kortdistanserakett i Kramatorsk-åtaket

USAs militære trur at det var ein rakett av typen SS-21 Scarab som vart brukt i åtaket fredag, seier ein høgtståande tenestemann i Pentagon ifølgje The Guardian.

Det er ikkje klart om det vart brukt klaseammunisjon i angrepet.

USA meiner, til liks med Ukraina, at Russland stod bak åtaket der minst 52 personar vart drepne og 300 såra, ifølgje ukrainske styresmakter.

Mindre treffsikker

Ukraina hevda fredag at Russland brukte ein rakett av typen Tochka-U. Tochka-U er eit anna namn for SS-21 Scarab. Rakettypen blir rekna for å vere mindre treffsikker enn Iskander-rakettane som Russland ofte bruker.

– Vi kjøper ikkje den russiske avvisinga om at dei ikkje var ansvarlege, seier tenestemannen.

Russland avviste fredag å ha stått bak åtaket. Kreml-talsmann Dmitrij Peskov sa at landet ikkje bruker rakettar av typen Tochka-U.

• LES OG: Krever krigsforbrytersak – russiske soldater skal ha avtalt drap

Zelenskyj: Russland må haldast ansvarleg

Ukraina president Volodymyr Zelenskyj sa i sin daglege video fredag kveld at dei som sto bak bombinga av jernbanestasjonen i Kramatorsk må bli halde ansvarlege.

– Dette er nok eit krigslovbrot. Vi ventar ein fast, globalt svar på dette krigslovbrotet, sa han i talen.

Han sa at etterforskinga må bringe på det reine kven som gav ordren og kva som skjedde minutt for minutt føre åtaket.

Han avviste påstandane frå Russland, og sa at dei tydelegvis forsøker å gje ukrainarane sjølve skulda for åtaket.

FN fordømmer

FNs generalsekretær António Guterres fordømmer og åtaket på sivile i Kramatorsk.

– Åtak på sivile og sivil infrastruktur er fullstendig uakseptabelt. Slike åtak er eit grovt brot på folkeretten. Dei som står bak må stillast til ansvar, seier ein talsmann for Guterres.

Over 6000 evakuert fredag

6665 sivile ukrainarar vart fredag evakuerte via humanitære korridorar, opplyser visestatsminister Iryna Veresjtsjuk på Telegram.

Laurdag held evakueringa frå Mariupol og andre kringsette byar fram i Zaporizjzja og Luhansk-området.

• LES OG: Når menneske gjer det umenneskelege

Tusenar av russiske soldatar nær Kharkiv

Tusenar av russiske soldatar har samla seg nær utkanten av den ukrainske byen Kharkiv, ifølgje ein høgtståande tenestemann i USAs forsvarsdepartement. Talet på taktiske einingar nær den russiske grensebyen Belgorod er auka frå 30 til 40, ifølgje Pentagon-tenestemannen.

Han oppgir ikkje nøyaktig tal på kor mange fleire soldatar det dreier seg om, men seier at denne type bataljonar typisk kan ha 600 til 1000 soldatar. Den russiske hæren samlar styrkane der for å kunne konsentrere seg om å overta den austlege ukrainske regionen Donbas, meiner han.

Kharkiv ligg nordaust i Ukraina, nær grensa til Russland. Byen har vegsamband til Belgorod. Det er indikasjonar på at Russland håper å kunne mobilisere over 60.000 soldatar, uttaler han.

Russland trur på siger innan 9. mai

Donbas er kjent territorium for både ukrainske og russiske styrkar etter årevis med konflikt der, og kampane kan derfor bli harde, åtvarar han.

– Dette kjem til å bli ein knivkamp. Dette kan bli svært blodig og svært stygt, seier tenestemannen ifølgje NTB.

Russland har et mål om å oppnå ein form for siger over Ukraina innan 9. mai, ifølgje europeiske tenestemenn som CNN og BBC har snakka med.

Portforbod i Odesa

Ukrainske styresmakter har innført portforbod i hamnebyen Odesa ved Svartehavet frå fredag kveld til måndag morgon. Årsaka er faren for rakettangrep.