– Møtet gjekk problemfritt, og det vart danna ein god relasjon, skriv USAs president Donald Trump på Twitter.
Der stadfestar han at Mike Pompeo, som er nominert som ny amerikansk utanriksminister, har møtt med leiaren i Nord-Korea Kim Jong-un.
– Atomnedrustning vil vere ein god ting for verda, men også for Nord-Korea!, skriv Trump.
Planlegg toppmøte
Det var avisa The Washington Post som først melde at det hadde vore eit møte mellom Pompeo og Kim. Avisa siterte to anonyme kjelder som skal ha hatt kjennskap til turen til Pompeo, og som sa at møtet skal ha skjedd i påskehelga.
Møtet skulle legge fundamentet for det kommande toppmøtet mellom president Donald Trump og Kim Jong-un.
I meldinga på Twitter stadfestar Trump at det vert jobba med detaljane rundt eit slikt møte.
Tysdag denne veka møtte president Donald Trump statsminister i Japan Shinzo Abe. Dei to hadde middag i Florida saman med førstedame Melania Trump og Akie Abe.
Foto: Kevin Lamarque / ReutersTrump: – Skal møte Kim snart
Då Trump tok imot Japans statsminister Shinzo Abe i Florida på tysdag, sa han at det truleg vert eit møte mellom han sjølv om Kim Jong-un i starten av juni eller kanskje til og med før det.
– Avhengig av utfallet av ulike møter og samtaler vi har no, skal vi møte Kim Jong-un veldig snart, sa Trump.
Men han la også til at det også er mogleg at ting ikkje gå så bra, og at det då ikkje vert noko møte.
Presidenten har tidlegare sagt at eit viktig premiss for møtet må vere at Nord-Korea er villig til å diskutere sitt atomvåpenprogram.
