Denne veka kom meldingane om at amerikanske styrkar hadde starta arbeidet med å utplassere det amerikanske rakettskjoldsystemet Terminal High Altitude Area Defense (THAAD) i Sør-Korea. Dei to landa blei samde om utplasseringa i fjor. Sjølve installeringa skjer raskare enn planlagt fordi spenninga i regionen har auka dei siste månadene.
Målet med rakettskjoldet er å verne Sør-Korea mot eit mogeleg angrep frå Nord-Korea.
- Les også:
- Les også:
No seier president Donald Trump at Sør-Korea bør ta rekninga. Han stiller seg uforståande til at USA skal betale.
Omstridt prosjekt
– Eg har informert Sør-Korea om at det ville på sin plass om dei betalte for dette, seier Trump i eit intervju med nyheitsbyrået Reuters. – Systemet er fantastisk bra, legg han til. Han seier at prislappen er rundt ein milliard dollar.
Avgjerda om å setje opp rakettskjoldsystemet THAAD har allereie vekt sterke reaksjonar. Då installeringa tok til denne veka, protesterte fleire hundre menneske. Dei er redde for at THAAD skal auke spenninga mellom Nord- og Sør-Korea, og at rakettskjoldsystemet skal få negative følgjer for miljøet.
Også Kina og Russland har protestert. Nord-Korea er kraftig provosert av det som no skjer.
- Les også:
- Les også:
USA og Sør-Korea har eit omfattande forsvarssamarbeid. Meir enn 28.000 amerikanske soldatar er utplasserte i landet. THAAD-avtalen mellom dei to landa kom på plass i Barack Obamas presidentperiode. Når Donald Trump no ber sørkoreanarane betale, er det i strid med avtalen.
– Vi har ingen planar om å endre på det som er avtalt – at USA betaler for dette, seier forsvarsdepartementet i Sør-Korea fredag.
– Avtalen er at Sør-Korea stiller eit landområde til disposisjon for rakettskjoldet. Men vi skal ikkje betale for operasjonen, heiter det.
Usikkert om handelsavtale
Intervjuet med Donald Trump har skapt reaksjonar i Sør-Korea også av ein annan grunn. Trump varslar nemleg at han anten vil reforhandle eller avslutte handelsavtalen mellom landa.
- Les også:
I intervjuet kallar han avtalen «forferdeleg» og «uakseptabel». Han seier at avtalen vil bli vurdert etter at administrasjonen er ferdig med å gjennomgå frihandelsavtalen med Canada og Mexico (NAFTA).
Avtalen – KORUS – blei forhandla fram under den republikanske presidenten George W. Bush in 2007. Den blei reforhandla under Barack Obama, og godkjend av den amerikanske Kongressen i 2011.
Sørkoreanske næringslivsleiarar reagerer fredag kraftig på signala frå Trump.
– Avtalen må vidareførast som ein svært viktig del av samarbeidet mellom dei to allierte landa, seier det sørkoreanske industriforbundet i ei fråsegn.