Desperat folkemengd møtte dei norske legane i Nord-Gaza: – Dei var heilt utsvoltne, ville i blikket

– Folk angreip bilen og kolonnen vår. Dei trudde vi kom med mat. Dei var heilt utsvoltne, ville i blikket, desperate.

Geir Stray Andreassen leiar det norske legeteamet til Norwac (Norwegian Aid Committee) som kryssa inn i Nord-Gaza laurdag ettermiddag.

Videoar frå staden viser folk som hamrar på vindauga og klatrar på bilen. Ei rute har bresta, og ein av bilane punkterte på vegen.

– Vi måtte berre gasse på og køyre vidare. Det ville vore farleg å stoppe, seier Andreassen vidare.

– Ein høgtalar på taket ropte beskjedar om at vi berre hadde medisinar i bilen, ikkje mat. Det skulle få folkemengda bort frå bilen.

Etter det umiddelbare sjokket, er alle fire komne fram i god behald til al-Awda sjukehuset i Beit Hanoun. Der skal dei bu og arbeide dei neste to vekene.

Einaste team på al-Awda

Dei norske legane er eitt av berre to team i den nordlege delen av Gazastripa, og det einaste som held til på al-Awda.

Teamet kryssa først inn i Gaza gjennom Rafah-grensa onsdag 3. april.

Dei prøvde å ta seg til sjukehuset på fredag, men måtte avbryte på grunn av tryggingssituasjonen. Kolonnen vende tilbake til Rafah same dag.

Både Andreassen og kollega Odd Arild Ågedal har jobba i Gaza fleire gongar før. Denne gongen kjente dei ikkje igjen landskapet rundt seg.

Førstnemnde fortel:

– Det var som om nokon hadde sloppe ei atombombe der.

– Heilt grotesk

300.000 menneske er rekna å vere igjen i nordlege Gaza, der nauda er aller størst som følge av Israel si krigføring i Gaza.

I tillegg til ernæringsutfordringane er det mange som er kronisk sjuke i tillegg til dei som blir skadde i angrep.

– Dette er ein helsesituasjon som er heilt grotesk og vi veit ikkje korleis vi kan handtere den, fortel dagleg leiar i Norwac, Erik Fosse, til NRK.

– Det hjelper ikkje om det kjem inn fleire lastebilar her og der. Det einaste som kan redde barna i Gaza no, det er våpenkvile umiddelbart.

Får hjelp av Verdas helseorganisasjon

Fleire hjelpeorganisasjonar har også nølt med å sende inn folk med mat og anna naudhjelp.

Dette spesielt som følge av det israelske angrepet måndag kveld, som drap sju hjelpearbeidarar frå World Central Kitchen.

Reisa til det norske legeteamet blei koordinert av Norwac via Verdas helseorganisasjon (WHO) i samråd med egyptiske og israelske styresmakter.

– Situasjonen er at samfunnet har brote heilt saman. Sjukehusa er flyktningleirar og ikkje sjukehus. Det gjer dei veldig vanskelege å drive, seier Fosse, som sjølv var i Gaza for to månader sidan.

– Vi skrapar på overflata, men samtidig jobbar vi døgnet rundt. Så dei vi klarar å hjelpe, hjelper vi, men det monnar lite.

Vil ha norske legar til stades ut 2024

Norwac jobbar med å få fleire legeteam inn i Gaza, og ønsker å ha folk til stades der i puljar minst fram til nyttår.

Fosse fortel at dei har fått mykje respons frå norske helsearbeidarar sidan dei starta med dette arbeidet.

– Vi har erfarne spesialistar i alle dei faga vi treng no på lang tid framover og blir stadig kontakta av folk som vil bidra. Det synest eg er veldig rørande og flott.

Han seier det også er ein omfattande prosess å velje ut personell som er rusta til å utføre arbeidet på bakken.

– Det blir skote over alt og du har bakgrunnstøyet heile dagen og natta frå bombing, hus som ristar, pasientar som kjem inn på sjukehusa med store skadar som ein må handtere. Så dette er også ganske psykisk krevjande.

Er du interessert i meir frå Utanriks? Høyr den nye podkasten frå redaksjonen her: