NRK Meny
Normal

New York slepp unna Trump-rekninga

New York skal sleppe å ta utgiftene med å passe på president Donald Trump og familien hans. Det har vist seg å bli svært så dyrt.

Inngangspartiet til Trump Tower

Inngangspartiet til Trump Tower på Fifth Avenue i New York.

Søndag kveld kom avtalen i boks – ein avtale som sikrar at føderale styresmakter tar rekninga for tryggingstiltaka rundt presidentfamilien i New York. New York får tilbake det dei har lagt ut for å sikre Trump og familien i Trump Tower på Manhattan.

New York og andre byar og statar som har vore vertskap for presidenten får tilbake i alt 523 millionar kroner ifølgje budsjettavtalen.

Representantar for Palm Beach i Florida, der Trump sin private klubb Mar-a-Lago ligg, har også bedt om hjelp til å dekke utgifter til tryggingstiltaka rundt presidenten.

– Godt nytt for New York

– Vi får det vi har rett på, sa borgarmeisteren i New York, Bill de Blasio måndag, ifølgje Reuters.

– Det er godt nytt for byen vår og for dei hardtarbeidande politifolka våre som har fått denne heilt spesielle utfordringa, sa han.

Trump Tower

Trump Tower på Fifth Avenue.

Foto: Kristian Elster / NRK

Han og politisjef James O'Neill har i fleire månader hatt tett kontakt med kongressrepresentantar frå New York for å få på plass avtalen, sa han.

Kongressen vil truleg godkjenne avtalen i slutten av veka.

Avtalen omfattar vel 170 millionar kroner for utgifter mellom valdagen i fjor og innsetjinga i januar i år, og rundt 350 millionar etter dette.

Inndekkinga kjem i tillegg til 60 millionar som blei sett av til det same formålet sist haust.

Enorme utgifter

Politiet i New York bruker mellom ein og 1,2 millionar kroner kvar dag på å passe på førstedame Melania Trump og presidentparet sin son Barron når presidenten sjølv ikkje er i byen.

Kostnadene aukar til rundt 2,6 millionar kroner dagen når Donald Trump er på plass, opplyser borgarmeisteren sitt kontor.

– Urimeleg

Heimen deira ligg på toppen av den 58 etasjar høge skyskraparen midt i eit populært turistområde på Fifth Avenue.

– Vi handterer gjerne presidentbesøk i byen, men kan ikkje ta på oss faste kostnader til å sikre presidentfamilien i Trump Tower. Det er eit ansvar for føderale styresmakter, seier borgarmeister Bill de Blasio.

– Det er heilt bak mål å forvente at lokalt politi skal bere ekstraordinære utgiftene til å verne den amerikanske presidenten, seier kongressrepresentant Carolyn Maloney, som var med på å dra avtalen i land.

Laster innhold, vennligst vent..
Laster innhold, vennligst vent..

SISTE NYTT

Siste nytt