Ein domstol i hovudstaden Mogadishu har dømt den 27 år gamle kvinna til eitt års fengselsstraff.
Dommarane legg til grunn medisinske prov som talar for at kvinna ikkje blei valdteken av soldatar i tryggingsstyrkane, slik kvinna sjølv hevdar.
Freelance-journalisten Abdiaziz Abdinuur, som intervjua kvinna om valdtekta, men som likevel ikkje har publisert intervjuet, er også dømd til eitt år innanfor fengselsmurane.
– Politisk motivert
– Me dømer henne for å ha krenkja statlege institusjonar ved å hevda at ho vart valdteken, sa dommar Ahmed Adan i retten tysdag.
Kvinna får utsetja soninga i eitt år, fordi ho har eit lite barn å ta seg av,
– Ho skal tilbringa eitt år i fengsel etter at ho er ferdig med ammeperioden, la dommaren til.
Mange innbyggjarar i Mogadishu reagerer tysdag med sinne og vantru på dommen, ifølgje ein BBC-reporter som er i byen.
Menneskerettsgrupper meiner dommen er politisk motivert, fordi det skadar styresmaktene sitt omdøme og personar tilknytta tryggingsstyrkane blir funne skuldige i valdtekt.
Den USA-stasjonerte organisasjonen Human Rights Watch meiner saka viser at «prioriteringane til den nye somaliske regjeringa er latterlege».
- LES OGSÅ: Attentat mot Somalias statsminister
Presidenten vil ikkje blanda seg
Direktøren i Komiteen for vern av journalistar (CPJ), Joel Simon, har sendt eit skriv der han oppmodar presidenten i landet til å gripa inn.
Det kjem ikkje på tale, seier president Hassan Sheikh Mohamud til Al Jazeera.
– Dette er den einaste regjeringa som har vist seg dedikert i arbeidet med å betra livsforholda for kvinner i Somalia (..). Eg har ikkje mandat til å gripa inn i rettssystemet. At eg blandar meg inn vil ikkje bidra til ein sterkare rettsstat i landet, uttalar presidenten til den arabiske TV-kanalen.
– Krenkingar og falske prov
Det var den somaliske fjernsynsstasjonen Universal TV som den 6. januar rapporterte om at væpna, uniformerte menn hadde valdteke ei kvinne i ein leir.
Same dagen fortalde Al Jazeera om at valdtekter utført av tryggingsstyrkar i leirane for internt fordrivne grupper i Mogadishu er utbreitt.
Det angivelege valdtektsofferet blei tiltalt for å ha krenkja eit statleg organ, leggja fram falske prov, simulera lovbrot og for å fremja feilaktige skuldingar.
Journalisten var tiltalt for å ha krenkja eit statleg organ og for å ha oppfordra kvinna til å leggja fram falske bevis i retten. Mannen har sete varetektsfengsla sidan den 10. januar og vil bli overført til soning med det same.
Ektemannen til kvinna og to andre personar som blei arresterte i samband med saka fekk i dag gå fri. Ektemannen blei arrestert fordi han støtta kona si i valdtektsskuldingane.
