Silvio Berlusconi blei lagd inn på sjukehus i Milano fredag for å gjere planlagde testar i samband med at han for ei tid tilbake fekk påvist leukemi, melder det italienske nyheitsbyrået Ansa.
Måndag morgon døydde Berlusconi på sjukehuset, med nær familie rundt seg. Han blei 86 år gammal.
Dei siste åra hadde han fleire helseproblem og var mykje inn og ut av sjukehus.
Han var statsminister i Italia i til saman ni år, fordelt på tre periodar. I etterkrigstida har ingen annan statsminister sete så lenge.
Forretningsmann
Berlusconi blei fødd i Milano i 1936. Han studerte jus i heimbyen, og arbeidde først som eigedomsmeklar, før han starta fleire eigedomsselskap.
På 1970- og -80-talet slo han seg opp som forretningsmann og medieeigar før han gjekk inn i politikken på 1990-talet.
Han bygde blant anna opp mediekonsernet Mediaset, som eig fleire av dei største media i Italia. Berlusconi var også i mange år også majoritetseigar i fotballklubben AC Milan i heimbyen Milano.
Silvio Berlusconi eigde i mange år fotballklubben AC Milan. Her frå då laget vann Champions League-finalen i 2007.
Foto: PHIL NOBLE / REUTERSInn i politikken
På starten av 1990-talet blei fleire etablerte politikarar og politiske parti i Italia ramma av ein korrupsjonsskandale.
Før parlamentsvalet i 1994 danna Berlusconi partiet Forza Italia, som blei det største partiet med 21 prosent av stemmene.
Berlusconi blei statsminister for første gong, men han måtte gå åtte månader seinare på grunn av usemje internt i regjeringa.
I 2001 blei han statsminister for andre gong. Denne gongen fekk han sitte i fem år. Før det blei tre nye år frå 2008 til 2011.
Han stilte også som statsministerkandidat i 2013, men populariteten hans var sterkt fallande. Partiet hans gjekk i regjering, men Berlusconi sjølv blei ikkje ein del av regjeringa.
I 2022 blei Silvio Berlusconi lansert som presidentkandidat i Italia, men fekk berre støtte frå parti på høgresida. To dagar før avstemminga trekte Berlusconi seg fordi han meinte det var betre at ein person med breiare oppslutning blei valt.
Foto: ANDREAS SOLARO / AFPKontroversar
Sjølv om Berlusconi til tider var ein populær politikar i Italia, var han også svært kontroversiell. Han blei blant anna tiltalt for korrupsjon og økonomisk kriminalitet.
I 2012 blei Berlusconi dømd til fire år i fengsel og utestenging frå politiske verv i fem år på grunn av skattesvik knytt til medieselskapet Mediaset, som Berlusconi og familien hans eigde.
Silvio Berlusconi måtte møte i retten fleire gongar skulda for blant anna økonomisk kriminalitet og maktmisbruk. Her frå Mediaset-rettssaka.
Foto: ALESSANDRO GAROFALO / ReutersÅret etter blei han dømd til sju år i fengsel for maktmisbruk og seksuell omgang med ein mindreårig. Men han blei seinare frikjend i ein høgare rettsinstans for desse skuldingane.
Berlusconi hevda i 2021 at han til då hadde vore gjennom 86 rettssaker opp gjennom åra. Men han sona aldri ei fengselsstraff, skriv nyheitsbyrået AFP.
I 2013 blei Berlusconi valt inn i nasjonalforsamlinga, men seinare på året blei det vedteke at han ikkje kunne halde fram som senator på grunn av dommen frå 2012. Denne avgjerda blei oppheva i 2018.
