Det tyske skipet Lifeline plukka torsdag førre veke opp 234 flyktningar og migrantar i Middelhavet. Skipet, som vert drifta av ein tysk hjelpeorganisasjon, har blitt nekta å legge til kai i Italia.
Tysdag sa den italienske statsministeren Giuseppe Conte at Malta hadde sagt ja til at skipet kunne legge til kai der. Conte sa også at Italia vil ta imot nokre av flyktningane og migrantane om bord som eit kompromiss.
Etter fråsegna frå Conte, presiserte derimot Maltas statsminister Joseph Muscat at Malta tek imot nokre av migrantane på vilkår om at andre EU-land hjelper til.
Tilbyr hjelp
Tysdag ettermiddag kunngjorde både lokalstyresmaktene i Berlin og styresmaktene i Portugal at dei vil ta imot nokre av dei.
Også den franske presidenten Emmanuel Macron har sagt at Frankrike kan ta i mot nokre av migrantane om bord på Lifeline.
Men det tyske skipet er ikkje det einaste skipet som har blitt nekta å setje i land migrantar dei har redda i Middelhavet.
Det danske skipet Alexander Maersk låg forankra utanfor Sicilia i over tre dagar før dei fekk legge til kai og setje av dei over hundre migrantane som var om bord.
Tidlegare i juni vart også det franske redningsskipet Aquarius nekta å legge til kai i Italia. Til slutt fekk skipet kome til den spanske hamnebyen Valencia.
- URIX FORKLARER
– Ignorerte instruksar
Statsministeren i Italia meiner skipet Lifeline og dei andre skipa har seg sjølve å takke for situasjonen dei hamnar i. Kapteinen «ignorerte instruksar frå italienske styresmakter», heiter det i fråsegna frå Statsministerens kontor.
Italia har nemleg bede hjelpeorganisasjonar om ikkje å plukke opp migrantar i Middelhavet, men overlate dette til den libyske kystvakta.
Malta og Italias avgjerd om å avvise båtar med migrantar har kasta Europa ut i politisk krise om handteringa av dei fleire tusen migrantane som kjem til Europa frå Afrika, Midtausten og Asia.