Ein plass var ledig då det var duka for tv-debatt mellom toryane som knivar om å bli ny leiar i partiet.
Då programleiar Krishnan Guru-Murthy i Channel 4 introduserte kandidatane som kan bli ny statsminister i Storbritannia, gjorde han eit poeng ut av Boris Johnsen nekta å stille til debatten, og viste til den ledige plassen.
Like etter kom reaksjonane på Twitter. Politisk redaktør i The Sun, Steve Hawkes, meiner det ser dumt ut og lurer på om kandidatane likar ideen.
Også motkandidatane reagerte. Før utanriksminister og motkandidat Jeremy Hunt starta på sine argument, gjekk han til angrep på Johnson.
– Viss han ikkje kan handtere fem vennlege kollegaer, korleis skal han takle dei 27 i EU, spurte Hunt retorisk og viser til at det er 27 medlemland i EU.
Boris Johnson hevdar at grunnen til at han ikkje vil stille er fordi småkrangling på direktesendt TV verkar mot hensikta.
Han har fått kritikk for å vere lite tilgjengeleg for pressa. I forkant av kveldens debatt fekk han sterk kritikk for avgjersla. Johnson skal likevel delta i ein debatt på BBC tysdag.
Boris Johnson er favoritt til å bli ny leiar for det konservative partiet – og den neste statsministeren i Storbritannia.
Møtte partiet laurdag
Laurdag møtte alle dei seks kandidatane som kjempar om å bli toryane sine nye leiar partiet bak lukka dører på eit hotell i London. Dei fekk kvar si runde på talarstolen for å overbevise om sitt kandidatur.
Storfavoritt Johnson skreiv på Twitter i etterkant at det er på tide å levere på brexit-saka.
På møtet skal Johnson ha sagt at han ønskjer å bringe nytt liv i partiet.
– Det vi må gjere er å stå fram med vårt grunnleggande konservative bodskap, sa Johnson, ifølgje valapparatet hans.
Uravstemming om to kandidatar
I dagane som kjem skal parlamentarikarane frå det konservative partiet halde fleire rundar med avstemmingar for å sile kandidatane. Om ei veke skal partiet stå igjen med to namn til leiarvervet i partiet.
I ei uravstemming skal dei 160.000 medlemmane i partiet stemme over dei to kandidatane. Ny leiar blir kunngjort i slutten av juli.
Også i forkant har fleire av motkandidatane til Johnson har vore kritiske til at den tidlegare London-ordføraren ikkje stiller i den 90 minutt lange tv-sendinga.
– Det geniale med britisk politikk er at vi ikkje oppfører oss som amerikanske presidentar, som feiar inn i ein bilkortesje. Hos oss handlar det om å snakke med folk, var bodskapen til motstandar og utviklingsminister Rory Stewart.