- Tilliten til politikarane står på spel

Det er tett av folk på fotballstadion i Warszawa. Utsendingar frå nesten 200 land er på plass for å delta i eit årleg "ritual": FNs klimaforhandlingar.

Det er innspurt no – for denne veka har politikarane teke over. Dei skal dra det heile i land etter at forhandlarane har drive tautrekking i ei veke. Fredag skal konklusjonen vere klar.

Ei gruppe norske ungdommar er på plass for å delta i det som skjer. Dei legg press på forhandlarar og ministrar – for dei er utolmodige.

København i 2009, Mexico året etter, så Sør-Afrika og Qatar – og no altså Polen. Framgangen har vore langt mindre enn forventa.

Ein frå kvar organisasjon

Vi spør ein representant frå kvar organisasjon om dei framleis har tillit til politikarane.

Silje Lundberg, leiar i Natur og Ungdom:

– Det er eit vanskeleg spørsmål å svare på. Men nei, ikkje alltid. For politikarane evner ikkje å løyse dette problemet som verda står overfor. Dei eg har mest tillit til, er dei som kjem frå dei frivillige organisasjonane, dei som er her for å presse på, som kan gjere det umogeleg for politikarane.

Ingrid Verne, leiar i klimautvalet i Changemaker, Kirkens Nødhjelps ungdomsorganisasjon:

– Eg har framleis tillit til dei, men dei gjer det vanskeleg for oss så lenge vi ikkje ser konkret handling. Vi forventar no at det særleg blir framgang når det gjeld finansiering av klimatiltak i fattige land. Det er viktig for å kunne halde oppe tilliten.

Hallvard Surlien, nasjonal talsperson i Grønn Ungdom:

– Ingen politikarar som kjem frå land som baserer velferda si på å tene pengar på fossile ressursar, som skaper slike katastrofar som vi nettopp har sett på Filippinane, kan snakke med truverd i desse forhandlingane.

Håvard Skjerdal, nestleiar i politisk utval for klima og miljø, KFUK/KFUM Global:

– Viss vi ikkje hadde hatt tillit til politikarane, hadde vi heller ikkje hatt nokon grunn til å vere her. Så vi må halde oppe ein viss tillit. Men det tyder ikkje at vi ikkje skal kjempe, og stå i opposisjon til politikarane når det dei gjer er altfor, altfor dårleg. Vi må likevel samarbeide med politikarane for å komme fram til dei gode løysingane.

Are Einari Skau, medlem i klimautvalet i Spire, Utviklingsfondets ungdomsorganisasjon:

– Vi har framleis tillit til politikarane, men vi har ei sterk oppfordring om at dei i framtida held seg meir til dei vitskaplege realitetane.

Marita Haug har eit spesielt oppdrag her på klimaforhandlingane i Warszawa. Ho er FN-delegat for klima og berekraftig utvikling, og representerer norsk ungdom på vegner av Landsrådet for Norges barne- og ungdomsorganisasjonar (LNU).

- Eg ønskjer å fronte norske born og ungdommar på ein best mogeleg måte, og arbeider blant anna med å betre ordningar i FN der born og unge kan delta. Og eg opplever at ungdom blir lytta til!

– Vil du reise skuffa heim fredag? Kva skulle du ønskje ville skje desse siste dagane i Warszawa?

– At alle land drog heim med ei klar heimelekse om at dei i løpet av 2014 har sett seg nokre klare mål for korleis dei skal redusere sine utslepp, at desse måla er ambisiøse – minst like ambisiøse som dei norske måla om opp til 40 prosent. Og så bør det komme langt meir pengar på bordet til finansiering (hjelpe fattige land å tilpasse seg klimaendringane og å kutte i sine utslepp).

– Kva er din beskjed dersom du kunne snakka direkte til dei no?

– Tenk i eit langtidsperspektiv! Vi må kunne forvente langt meir enn at de tenkjer berre på kort sikt, slik marknaden gjer. De er mykje betre enn som så, så de må tenkje på utviklinga for lang tid framover!

• Les også: Ny klimaavtale: Ei side er klar
  
• Les også: Vi blir stadig mer avhengige av kull