Islamistar fekk innfridd krava i Pakistan

Politiet prøvde først å fjerne demonstrantane på laurdag, men aksjonen tok ein valdeleg retning.

Sju personar vart drepne og 200 skadde.

Politiet måtte avbryte aksjonen da valden byrja spreie seg til andre Pakistanske byar.

• LES: Blokkerer vegar i profeten Muhammeds namn

Det hjelpte heller ikkje at styremaktene sensurerte fjernsynet og sosiale medium som Youtube, Facebook, og Instagram.

Dei mektige generalane i Pakistan har no gripe inn og bedt partane om å besinne seg. Og regjeringa har gjeve etter for demonstrantane, som blir beskrivne som «hardline» islamistar av BBC.

Regjeringa gav etter for krava

– Våre krav er innfridde. Justisministeren har gått av, og vi vil avslutte protesten, sa talsmann for islamistrørsla Tahreek-e-Laibak, Ejasz Ashrafi, til Reuters.

Dette har vore hovudkravet til demonstrantane, som i tjue dagar har blokkert ein motorveg utanfor Islamabad.

Protestane har nesten paralysert den pakistanske hovudstaden, skriv Dawn.

Profeten utelaten i valeid

Bakgrunnen for protestane er ei ny lov, der ein har utelate å referere til Profeten Muhammed når politikarar blir tekne i eid.

Justisminister Zahid Hamid har beklaga dette, og seier det var ein saksbehandlingsfeil.

Men dette har ikkje vore nok for demonstrantane som har fått fleire krav innfridd:

1. Justisministeren går av straks, så vil det ikkje bli utferda ein «Fatwa» mot han.
2. Namna på dei som stod bak lovendringa vil bli offentleggjort, slik at ein kan sette i verk nødvendige tiltak.
3. Alle demonstrantar som har blitt arresterte, vil bli sett fri.
4. Ein vil granske politioperasjonen mot demonstrantane på laurdag.