Medan meldingane kjem om at den syriske borgarkrigen til no har kravd 100.000 liv sidan starten i 2011, åtvarar kongen av Jordan om at krigen kan blusse opp ei stor regional konflikt i Midtausten på grunn av dei religiøse samansetningane i regionen.
– Det er heilt klart at den syriske borgarkrigen kan gå frå å vere ein borgarkrig til ein regional og sekterisk konflikt, sa Kong Abdullah ifølgje nyheitsbyrået Reuters.
Kampar i Libanon og Irak
I deler av Midtausten er det særskild spent stemning mellom sunni- og sjiamuslimske grupper. I Irak har 2.000 menneske blitt drepne sidan april i år. Mange av bilbombene i landet har vore retta mot bydelar kor ei av dei to muslimske gruppene er i stort fleirtal.
Også i Libanon har det fleire gonger dei siste vekene vore kampar mellom sunni- og sjiamuslimar. Den spente situasjonen mellom dei muslimske gruppene i både Libanon og Irak er påverka av den syriske borgarkrigen.
- LES OGSÅ:
- LES OGSÅ:
Og det er endå fleire partar i saka, som gjer det kompliserte biletet endå vanskelegare. Fleirtalet av dei syriske opprørarane er sunni-muslimar og tek mellom anna mot støtte frå Saudi-Arabia. Også Tyrkia og Libya har tatt opprørarane si side.
Israel med trugslar
Men på den andre sida har den sjiamuslimske gruppa Hizbollah bidratt til å skape endå skarpare skilje mellom dei to gruppene. Og stormakta Iran har også støtta den syriske regjeringshæren i kampen mot opprørarane.
- LES OGSÅ:
- LES OGSÅ:
Hizbollahs inntog i konflikten har også fått Israel til å gå ut med truslar om at dei vil svare på eventuelle angrep. På eit tidspunkt var kampane mellom regjerings- og opprørshæren så nær Israels grense at mange frykta ei israelsk innblanding.
– Det er på tide med ein meir seriøs arabisk og internasjonal koordinering for å stoppe den syriske krisa. Dette kan ikkje vente lenger, seier Kong Abdullah av Jordan.
Dei menneskelege lidingane er store i Syria. Denne guten sørger over tapet av far sin.
Foto: Rodrigo Abd / ApKristne og jødar involvert
Som om ikkje dei muslimske motsetnadane gjer situasjonen vanskeleg nok, så er også andre religionar representert i regionen. Mellom anna er det ein kristen minoritet på ti prosent i Syria, og i nabolandet Israel er det som kjent jødane som er i fleirtal.
Den kompliserte religiøse samansetninga i Midtausten har skapt trøbbel fleire gonger opp gjennom historia, og går det slik den jordanske kongen fryktar kan dei same religiøse skiljelinjene bidra til regional storkrig.
