Frå skogbrann til flaum i Aten

Minst 82 menneske har mista livet og over 180 er skadde etter fleire dagar med kraftige skogbrannar i Hellas. Medan leitinga etter omkomne heldt fram i brannruinane, kom regnet til Aten torsdag.

Men den tørre grunnen klarte ikkje å ta unna det kraftige regnet, og førte til flaum i områda rundt Aten. Brannvesenet i Aten har rykka ut til fleire heimar og forretningar som har stått under vatn.

• Les: Sverige mister kritisk brannhjelp

Mannskap måtte også rykke ut til ein parkeringsplass nord for Aten der fleire menneske var fanga i bilar etter at grunnen blei til ein sjø av gjørme. Styresmaktene oppmoda bilførarar til å unngå området, og har stengt motorvegen ut av Aten.

Hæren kopla inn

Ein del av nedbøren som kom torsdag, fall i området der landsbyen Mati ligg, aust for hovudstaden. Dette området blei hardt råka av skogbrannane. Mange av dei omkomne i brannane budde i landsbyen.

Det greske forsvarsdepartementet har kalla ut soldatar for å få rydda opp i ruinane og grave grøfter som kan leie vatnet bort og hindre flaum i det brannherja området.

I november mista 16 menneske livet etter flaum i områda rundt Aten. Det er så langt ikkje meldt om døde eller skadde etter styrtregnet torsdag.

Langvarig opprydding

Det vil ta lang tid å få rydda opp etter skogbrannane. Fleire tusen hus som har fått store brannskadar, og dødstala stig stadig. Men arbeidet med å få identifisert dei døde er vanskeleg. Tyskland har sendt rettsmedisinske ekspertar til Hellas for å hjelpe til i arbeidet.

Styresmaktene jobbar også med å få oversikt over dei materielle skadane etter skogbrannane. Ekspertar har så langt undersøkt nesten 2.500 brannskadde hus. Halvparten av desse er det ikkje mogleg å bu i.

• Les: Måtte flykte fra skogbrann i Aten – dukket under vannet for å holde håret vått
• Les: Hellas: Mistenker at skogbrannene er påsatt av plyndrere