– Fredsavtalen inneber ein ny dag for Etiopia, står det i ei utsegn frå Den afrikanske unionen (AU).
AU har sidan tysdag førre veke leia forhandlingane mellom dei to krigførande partia i Sør-Afrika.
I dag kunne unionen melde om eit gjennombrot.
Den etiopiske regjeringa og Tigray-styresmaktene har vorte samde om ein organisert, smidig og samordna avvæpning. Men også gjenoppretting av lov, orden og offentlege tenester, samt uhindra tilgang til humanitær hjelp.
Frigjeringsfronten til tigray-folket (TPLF) kallar avtalen for ein «ny start».
– Vi er klare for å setje i gong og gjennomføre denne avtalen, seier sjefforhandlaren for TPLF Getachew Reda.
Han seier også at dei har måtta inngå smertefulle innrømmingar, men at det var nødvendig for å byggje opp tilliten mellom partane.
Sjefforhandlaren til den etiopiske regjeringa understrekar at avtalen no må følgast opp.
– Det no opp til oss alle å følgje denne avtalen, seier Redwan Hussein.
Humanitær krise
Krigen har vart i to år og ført til ei enorm humanitær krise for sivilbefolkninga i Tigray.
Tusenvis av menneske har mista livet i kampane, og fleire millionar har måtte flykte frå heimane sine.
Det har også vore meldt om overgrep mot sivilbefolkninga og ei større svoltkatastrofe på grunn av manglande naudhjelp.
– Det er viktig at alle partar no bidreg til at det blir slutt på kamphandlingar og at reelle og berekraftige forhandlingar kan følgje. Meldingane frå forhandlingane i Sør-Afrika gir håp om det, seier Kirkens Nødhjelps landsdirektør i Etiopia, Eivind Aalborg til NRK.
– For å kunne nå ut til alle som treng humanitær støtte i Tigray og ulike område i Etiopia, er ein slutt på kamphandlingar nødvendig.
Krigen starta 4. november 2020. Då sat regjeringa i Addis Abeba i gong ein storstilt offensiv i Tigray for å avsette dei regionale leiarane. Desse leiarane hadde lenge vore på kollisjonskurs med statsminister Abiy Ahmed.
– Barn døyr kvar einaste dag
Så seint som for to veker sidan åtvara sjefen i Verdshelseorganisasjonen, Tedros Adhanom Ghebreyesus, mot eit folkemord i Tigray.
Han kjem sjølv frå området, og har familie som er hardt ramma av krigen.
– Det finst ingen annan situasjon i verda der 6 millionar menneske har vore omleira i nesten to år. Bankvesenet, mat, elektrisitet og helsevesenet blir brukt som våpen i krigen, seier han.
Han understrekar at sjølv menneske som har pengar, svelt fordi dei ikkje har hatt tilgang på banktenester på to år.
– Barn døyr kvar einaste dag av undernæring.