I dei siste dagane er store område i Australia herja av skogbrannar, og meir enn 200 hus er brunne ned langs den søraustlege kysten av Australia.
I den vesle kystbyen Mogo vart fleire innbyggarar evakuerte då flammane bredde seg rundt byen måndag morgon.
Chad Staples og staben hans på Mogo Wildlife Park begynte å gå tom for alternativ. Den lokale dyrehagen, som er heimen til den største private samlinga i landet av eksotiske dyr, var i ferd med å bli omringa av flammane.
Då bestemte staben seg for å flytte dyra til ein for mange utenkeleg stad: Heim.
Dermed flytta fleire pandaer, aper og ein tiger inn til dei tilsette.
Ein tiger i hagen
– Ein utruleg innsats av eit fantastisk team av lidenskapelege tilsette i dag. Kvart dyr er trygt og får god omsorg, skreiv leiaren for dyrehagen, Chad Staples på Twitter.
Han roser dyrepassarane som vart igjen i dyrehagen trass i evakueringsrådet som vart gitt og seier at redningsaksjonen kjendest ut som «Armageddon».
Då skogbrannane rasa i full fart mot dyrehagen måndag kveld, hjelpte alle tilsette og frivillige til i berginga. For at ikkje dyrehagen skulle ta fyr, vart alle områda spraya med vatn. Deretter vart dei største dyra – sebraer, sjiraffar, orangutangar og nashorn – innlosjerte i dei trygge delane av dyrehagen.
Det var likevel fleire dyr som ikkje hadde nokon trygg stad å vere, og dei tilsette såg inga anna løysing enn å ta vare på dyra sjølv.
Fleire pandaer og aper flytta inn hos leiaren for dyrehagen Chad Staples, medan ein annan tilsett lét tigeren til dyrehagen bu i hagen sin, fortel ein talsperson for Mogo Wildlife Park til BBC.
Redningsaksjonen redda dermed fleire utryddingstrua dyr frå døden.
Ein «Noahs ark» heime
Chad Staples, leiaren i dyrehagen, beskriv no heimen sin som ein Noahs-ark scene:
– Akkurat no er det ulike dyr i alle romma i huset mitt, seier Staples til Australian Broadcasting Corp.
Han presiserer at han er nøye med å ha ulike dyr i kvart rom slik at ikkje det oppstår problem.
Ein av de andre tilsette i Mogo dyrepark, som har ein tiger heime i hagen, fortel at tigeren har det bra etter forholda.
Ønsker seg regn
Dagen etter redningsaksjonen fortel dyrehagesjefen at han trur dyrehagen har sleppt unna faren, og at dyrehagen no vil føre tilbake dei ulike artane til dei respektive bustadane sine i dyreparken.
– Akkurat no er det mykje betre enn det var for nokre timar sidan. Det er framleis område vi passar på, men det er ikkje «Armageddon» lenger, seier Staples til ABC Net.
Dei dyra som vart igjen i dyrehagen, mellom anna sjiraffar og snøleopardar, skal ifølgje Daily Telegraph òg vere trygge.
I etterkant av redningsaksjonen har dyreparken samla inn fleire tusen australske dollar.
Leiar i dyrehagen, Chad Staples, fortel at pengane vil gå til å hjelpe skada dyr og ikkje direkte til dyrehagen.
